Nebojsha Stefanoviq, ministri serb i Mbrojtjes ka qenë në kufirin ndërmjet Kosovës dhe Serbisë, në Jarinje, i cili është shprehur se kushti për uljen e tensioneve në veri të Kosovës dhe fillimin e dialogut është tërheqja e njësive speciale të Policisë së Kosovës nga ajo pjesë.
I shoqëruar nga shefi i shtabit të përgjithshëm të ushtrisë serbe, Milan Mojsiloviq dhe ambasadori rus në Beograd, Aleksandar Bocan Kharchenko, vizituan pjesën ku po qëndrojnë pjesëtarë të xhandarmërisë serbe e protestues afër kufirit.
“Unë refuzoj thirrjet për de-eskalim të situatës drejtuar të dyja palëve, sepse ne nuk po provokojmë, nuk e kemi arrestuar askënd, nuk kemi hyrë në veri, nuk po kërcasim me armë, as nuk kemi bërë ndonjë lëvizje që i ngre tensionet. Ne jemi gati për dialog, por ata duhet t’i heqin njësitë speciale dhe ta kthejnë situatën në gjendjen e mëparshme” – tha Stefanoviç.
Në lidhje me situatën e tensionuar kanë reaguar edhe institucionet ndërkombëtare, ku kanë bërë thirrje për përmbajtje dhe tërheqje të trupave.
