Vetëm dy ditë para mbylljes së vitit 2021, Ministria e Financave ka akorduar një fond prej 2 miliardë lekësh në llogari të Koorporatës së Investimeve, institucion në administrimin e Ermal Frashërit. Kjo shumë e konsiderueshme parash është dhënë në datën 30 dhjetor, ndaj një institucioni që ka si detyrë detyrë nxitjen e zhvillimit ekonomik nëpërmjet projekteve të investimit. Mesa duket investimet janë parë të arsyeshme nga Ministria e Financave që të stimulohen në orët e fundit të vitit 2021, duke konsumuar deri në ‘pikën’ e fundit buxhetin e vitit 2021.
Ndërkohë në ët dhënat e publikuara vetëm në muajin dhjetor, janë kryer 125 transaksione me vlerë më të lartë se 100 milion lekë, dhe total pagesash 42 miliard lekë të reja. Këto para janë akorduar për palë të treta, ndërsa në total gjatë gjithë muajit janë shpërndarë 84 Miliard Lekë. Ajo që bie në sy në këto transaksione është fakti që një pjesë e mirë e tyre janë kryer në dy ditët e fundit të vitit, duke ngritur dyshime që këto shuma të majme parash janë akorduar si një ‘emergjencë’ e konsumimit të buxhetit të vitit 2021, më shumë se nevoja për të kryer investime në dobi të taksapaguesve.
Ndërsa në 100 tenderat me vlerat më të larta, 15 prej tyre janë të Autoritetit Rrugor Shqiptar. ARA ka tenderuar disa akse kryesisht në territorin e Tiranës, si punimet në Unazën e Jashtme me Lot, Sheshi Shqiponja tek lumi i Tiranës, etj. Sipas “Open Data Albania”, 35 tendera nga 100 tenderat më të mëdhenj janë bërë me procedurë të kufizuar dhe procedurë të negociuar, që do të thotë procedurë pa garë.
Dokumentet zyrtare, që shihni në fotot e mëposhtme tregojnë transaksionet e kryera për një sërë shërbimesh, të cilat kryhen pikërisht dy ditë para se viti të mbyllet, duke tërhequr drejt vetes si ‘gropë thithëse’ çdo qindarkë të arkës së shtetit.
Çfarë është Korporata e Investimeve Shqiptare
Korporata e Investimeve Shqiptare është krijuar me ligjin e fundit të vitit 2019. Është krijuar si shoqëri tregtare, me pronar shtetin, por ku edhe Institucionet Financiare Ndërkombëtare të Zhvillimit mund të zotërojnë aksione. Synon menaxhimin e pronave të shtetit nëpërmjet projekteve me interes kombëtar.
Objekti i veprimtarisë së Korporatës është, sipas rastit, hartimi, analizimi, koordinimi, menaxhimi, përfaqësimi, financimi, zbatimi dhe mbikëqyrja e projekteve. Korporata identifikon prona shtetërore me interes për të realizuar projekte investimi, i propozon Këshillit të Ministrave, transferimin e tyre tek Korporata. Me transferim kuptohet kalimi i të drejtës së përdorimit dhe/ose i të drejtës së pronësisë të pronave shtetërore nga pushteti qendror ose vendor tek Korporata.
Për zhvillimin dhe zbatimin e një projekti investimi, Korporata mund të mbështetet nga Shteti me infrastrukture ndihmëse, të tilla si: rrugë, ujësjellës, kanalizime, energji elektrike dhe telekomunikacion.
Korporata përjashtohet nga rregullat e prokurimit publik. Procedurat dhe rregullat e prokurimit të veçantë sipas kësaj pike, përcaktohen me Vendim të Këshillit të Ministrave, në përputhje me praktikat më të mira të Institucioneve Financiare Ndërkombëtare të Zhvillimit.
Përshkrimi i këtij institucioni tregon qartësisht se në llogari të kujt do të shkojnë këto para, pikërisht në llogarinë e atyre që privatizojnë çdo resurs të këtij vendi, duke “thithur” para taksapaguesish, që nuk kthehen kurrë në favor të këtyre të fundit.
Discussion about this post