Ministria për Evropën dhe Punët e Jashtme ka reaguar me një njoftim zyrtar pas lajmit që qarkulloi në media, se Greqia nuk njeh certifikatat e vaksinimit për shqiptarët as kur bëhet fjalë për vaksinën Pfizer/BionTech.
MEPJ njofton se të gjitha certifikatat e vaksinimit të lëshuara nga autoritetet shqiptare njihen dhe janë të vlefshme në Greqi njësoj si më parë. Raste sporadike të problemeve me leximin e këtyre certifikatave nga sistemet respektive të shtetit grek nuk janë të kufizuara tek dokumentet shqiptare, por janë vërejtur për shtetas të kombësive të ndryshme që jetojnë e punojnë në Greqi.
Ministria njofton se i vetmi ndryshim në rregullat ndaj Covid – 19, lidhet me moshën e të miturve që duhet të paraqesin test Covid, përpara udhëtimit në territorin grek. Në dallim me udhëzimin e mëparshëm, udhëtarët e mitur nga mosha 4 deri në 17 vjeç mund të udhëtojnë me avion me paraqitjen e testit brenda 24 orëve, në ndryshim nga 4 deri 11 vjeç që parashikohej më parë.
Sipas njoftimit, të vaksinuarit duhet të kenë përmbushur të paktën përpara 14 ditëve vaksinimin për Covid-19 dhe të paraqesin vërtetim/certifikatë vaksinimi.
Udhëtarët e fluturimeve brenda Greqisë, të cilët nuk janë vaksinuar, duhet të kenë rezultat negativ të testit PCR, kryer brenda 72 orëve nga dita e nisjes, ose brenda 48 orëve me rapid test para nisjes së fluturimit. Të miturit nga 4 deri në 17 vjeç mund të kryejnë udhëtimet e tyre me avion edhe me rapid test deri në 24 orë nga ora e fluturimit.
Discussion about this post