Ministrja e Infrastrukturës, Belinda Balluku ka deklaruar se Byepass-i i Vlorës do të hapet në mënyrë provizore më 15 korrik.
Teksa inspektoi nga afër ecurinë e punimeve, Balluku tha se kjo arterie e re rruge jo vetëm do të lejtësojë ndjeshëm trafikun nga Radhima te Kalaja në Vlorë, por do t’i ofrojë pamje piktoreske turistëve.
“Bypass i Vlorës është një arterie shumë e rëndësishme ku prej muajsh punohet intensivisht që të jetë e hapur për qarkullimin e automjeteve gjatë këtij sezoni turistik, duke e shkurtuar ndjeshëm lëvizjen drejt bregdetit të jugut.Kemi inspektuar të gjithë kantierin dhe për të diskutuar me inxhinierët dhe tekniket për të gjitha problematikat e hasura dhe për ta hapur këtë vepër në mënyrë provizore gjatë periudhës së sezonit. Me këtë projekt jo vetëm do të lehtësohet ndjeshëm trafiku nga Radhima te Kalaja në Vlorë, por do t’ju ofrojë pamje vizitorëve. Më 15 korrik do të hapet së bashku me sezonin turistik”, tha Balluku.
