Pavarësisht alarmit të ngritur nga FMN për mungesë transparente dhe tejkalim të kostove mbi tavanin e vendosur, qeveria shqiptare duket se, jo vetëm njërin vesh, por të dy veshët i ka bërë shurdhë, duke deklaruar se deklaratat e Fondit Monetar Ndërkombëtar nuk janë shqetësuese. Madje, ministrja e Financave,Delina Ibrahimaj, ka deklaruar se do marrim prapë borxh.
“Deklarata e FMN duhet të lexohet me vëmendje. Ndamë një mendim të përbashkët me FMN që ekonomia ka ardhur në përmirësim, ka treguar stabilitet në përballimin e dy krizave, tërmetit dhe pandemisë dhe i ka të gjitha potencialet për të përballuar krizën energjetike nëse do të përmbahet në përmasat që parashikohet në tregjet ndërkombëtare”, tha ajo.
Ndërkohë, një ditë më parë, FMN i kërkoi qeverisë shqiptare që të rrisë transparencës e shpenzimeve publike, ndërsa investimet publike tejet ambicioze të financuara me burime të brendshme (që nuk lidhen me tërmetin) duhet të moderohen.
Ndërkohë, Ibrahimaj theksoi Shqipëria është gati dhe do të dalë në Eurobond në fund të muajit tetor për të siguruar një huamarrje që do të sigurojë mbështetje buxhetore.
“Jemi gati për të dalë në treg në fund të muajit Tetor. Tregjet kanë pasur problematika për shkak të krizës energjetike apo edhe për shkak të sinjaleve nga ekonomia globale. Jemi besimplotë që kushtet janë të favorshëm për të dalë brenda këtij viti në Eurobond për një huamarrje për t’u përdorur për mbështetje buxhetore”, deklaroi Ministria e Financave.
