Ministrja e Bujqësisë dhe Zhvillimit Rural, Frida Krifca ka dhënë detaje mbi situatën sipas qarqeve, pas reshjeve të dendura që përfshinë të gjithë vendin, duke sjell përmbytje në disa zona.
Përmes një postimi në Facebook, Krifca informon se në tre hidrovorët e Drejtorisë së Ujitjes dhe Kullimit në Durrës, gjendja paraqitet e mirë dhe pompat janë në punë me kapacitet të plotë. Ndërkohë niveli i ujit ka pësuar tërheqje në zonat problematike.
“Në Hidrovorët Hamallaj dhe Synej, niveli i ujit është 45 cm, teksa në Greth është 30 cm, pra në nivele të ulëta. Në Fier, situata e niveleve të ujit në lumenj po shkon drejt përmirësimit. Vazhdon ulja e niveleve të ujit në lumenjtë Vjosa, Shkumbin, Seman, Pavlla, Kalasa, Drinos dhe Shushica, niveli i cilëve ka pothuaj 24 orë që është brenda shtratit. Gjendja elektro-mekanike ne hidrovorët Terbuf, Karavasta, Divjakë, Povelçe, Seman, Akerni, Orikum, Çukë e Butrint është në gatishmëri të plotë.
Krica gjithashtu njofton se në qarkun e Korçës hidrovori i Tushemishtit nuk është në funksion pasi niveli i ujit ndodhet në minimum.
“Qarku Korçë vijon pa reshje, me temperatura të ulëta nën 0 gradë. Fusha e Maliqit pa asnjë pasqyrë uji deri në këto momente. Hidrovori Tushemisht, aktualisht nuk po punon, pasi niveli i ujit është në minimum.”
Ndërsa në qarkun e Beratit nuk paraqitet asnjë problematikë. Niveli i Shkumbinit, sipas raportimit të ministres Krifca ka shënuar një rënie me 50 cm nga piku i djeshëm.
Në qarkun Berat, janë ndalur reshjet që prej mesditës. Hidrovori Konisbaltës nuk është në punë, pasi kuotat janë në minimum dhe nuk paraqitet asnjë problematikë. Qarku Elbasan që prej mesditës vijon pa reshje. Niveli i Shkumbinit në hidrometri tregon një rënie me 50 cm nga piku i djeshëm. Situata tashmë është e qetë dhe joproblematike, duke shkuar në normalizim në të tre qarqet. Situata në qarqet Lezhë, Shkodër e Kukës është pa probleme e po shkon drejt normalizimit.”, shprehet Ministrja Krifca.
Discussion about this post