Kryeministri Edi Rama ka ftuar në episodin më të fundit të podkastit të tij “Flasim” ministren e re të Shëndetësisë, Evis Sala, ku përveç prezantimit të saj si profesioniste me eksperiencë ndërkombëtare, nuk munguan as komentet me ironi për zotërimin e saj të gjuhës shqipe.
Në hapje të bisedës, Rama e prezantoi Salën si një profesioniste të shquar me gati 30 vite karrierë në mjekësi jashtë vendit:
“Karriera jote është shumë e gjatë, si fjalimet e mia,” tha ai me buzëqeshje.
Por pavarësisht vlerësimeve, Rama nuk ngurroi të ngacmonte me humor ministren për shqipen e saj, duke i thënë:
“Duhet të bësh stërvitje me shqipen këtë periudhë”, një koment që u prit si shaka, por që theksoi sfidën e ministres së re në përballjen me publikun shqiptar në një rol të rëndësishëm institucional.
Vetë ministrja Sala u shpreh se ndonëse ka kaluar një pjesë të madhe të karrierës jashtë vendit, është gati për sfidën në drejtimin e shëndetësisë shqiptare:
“Përvoja më ka mësuar të përballem me sfida të mëdha dhe të jap rezultate konkrete,” u shpreh ajo.
Duket se Kryeministri ka në plan të mbajë nën vëzhgim publik jo vetëm punën, por edhe shprehjet në shqip të ministres së re – një kombinim tipik i stilit të tij ironik dhe pritshmërive të larta ndaj bashkëpunëtorëve të kabinetit.
Discussion about this post