Deputeti i Partisë Demokratike Saimir Korreshi nuk i ka ndalur batutat edhe një ditë pasi shkaktoi batuta në sallën e Kuvendit dhe u shkaktoi të qeshura të gjithë deputetëve.
NË një intervistë për mediat ditën e sotme, Korreshi tha se me siguri në spitalin e Lushnjës janë vënë çarqe minjsh, sepse pas deklaratës së tij, mund të shkojë ministrja Ogerta Manastirliu.
I pyetur për dialektin me të cilin ka folur, Korreshi tha se ai nga Lushnja është dhe këtë gjë nuk e mohon dot, por batutat ishin një mënyrë që ai të tërhiqte vëmendjen për të nxjerrë në pah problematikat që ka qyteti i Lushnjës.
“Qeveria është në tjetër dimension, qeveria zbret nga makinat luksoze dhe ecën përmes tapetit të kuq për tu futur në zyrë. Zoti Basha nuk e priste realisht që unë mund t’i bëja vërtetë ato batuta. Unë nuk e ndryshoj dot se jam nga Lushnja, ky është dialekti ynë, për mua nuk është problem kjo gjë. Nuk pezmatohem, po të shikoni nuk e kam prish fare terezinë. Sot në spitalin e Lushnjës me siguri kanë vënë çarqe për të kapur minj sepse mund të shkojë ministrja Manastirliu. Nuk pendohem për asgjë, isha koshient. Nuk kam ofenduar njeri absolutisht. Një program i tillë qeveritar nuk mund të jepet për të fyer inteligjencën tonë. Ne në Lushnje e kemi humbur përfaqësinë sepse drejtuesit politikë vijnë nga rrethet e tjera dhe nuk e njohin aspak situatën,”- është shprehur Korreshi.
Ditën e sotme bëri xhiron e rrjeteve sociale deklarata e deputetit demokrat të Lushnjës, pasi mënyra se si i drejtonte shqetësimet e qytetit që përfaqëson, shkaktoi shumë të qeshura në seancën plenare.
