Në intervistën e dhënë për emisionin “Kjo Javë”, kryetari i sapozgjedhur i dalë nga zgjedhjet e 6 marsit i Bashkisë së Shkodrës, Bardh Spahia, ka folur për marrëdhënien që ka me ish-kryeministrin Sali Berisha. Spahia tha se marrëdhëniet i ka shumë korrekte me Berishën dhe se fitorja në Shkodër ka qenë edhe e Komisionit të Rithemelimit. Ai gjithashtu tha se me kandidatin tjetër të PD-së, Xhemal Bushati, ka pasur marrëdhënie bashkëpunimi shumë të mira, por që janë ndërprerë pas procesit zgjedhor.
“Marrëdhëniet me të i kam shumë korrekte. Ka qenë një fitore e madhe për demokratët dhe Komisionin e Rithemelimit dhe entuziazmi i parë ka qenë telefonata e profesor Berishës “Urimet më të mira”- më tha me një entuziazëm të madh. Me Xhemal Bushatin kemi pasur bashkëpunime por pas procesit të garimit nuk kemi pasur komunikim” – tha Spahia.
Kujtojmë se Bardh Spahia ishte kandidat për deputet në zgjedhjet e 25 prillit, por jashtë listës së sigurt, gjë që bëri mos të fitonte mandatin e deputetit. Pas përçarjes së PD-së, Spahia zgjodhi t’i bashkohej Sali Berishës.
Discussion about this post