Ambasadorja amerikane në Tiranë, Yuri Kim ka përshëndetur miratimin e hartës së re gjyqësore. Përmes një postimi në rrejtët sociale ajo shprehet se me miratimin e kësaj harte KLGJ ka përmbushur detyrimet si institucion përgjegjës. Sakaq, ajo theksoi se tashmë është koha që sistemi i drejtësisë t’i garantojë sigurinë dhe drejtësinë 100% qytetarëve.
“Mirëpresim miratimin nga Këshilli i Ministrave të hartës së re gjyqësore sot. Harta e gjykatave të Shqipërisë u hartua nga Këshilli i Lartë Gjyqësor nëpërmjet një procesi që përfshiu Ministrinë e Drejtësisë dhe aktorë të tjerë, si dhe ndihmë teknike nga qeveria e Shteteve të Bashkuara, Bashkimi Europian dhe Këshilli i Europës. Marrëveshja për hartën, e cila pasoi konsultime të gjera dhe marrjen në shqyrtim të shqetësimeve nga palët e interesuara si pjesë e procesit tre-vjeçar, përfaqëson një shembull të mirë të bashkëpunimit ndërmjet institucioneve të pavarura. Këshilli i Lartë Gjyqësor ka përmbushur me sukses detyrimin e tij ligjor për të garantuar rregullisht që sistemi i gjykatave është gati për të siguruar performancë te efektshme gjyqësore dhe për t’i dhënë drejtësi pa vonesë qytetarëve shqiptarë”, shkruan Kim. Kujtojmë se pak më parë edhe avokatët kanë vendosur të ndërpresin bojkotin që kishin nisur prej javësh.
Discussion about this post