Komisioni i Ekonomisë ka miratuar ndryshimin e buxhetit të shtetit për herë të 6 brenda këtij viti. Por deputeti socialist Erion Braçe ka shprehur rezervat e tij për këto ndryshime, ndërsa ka ngritur një sërë pikëpyetjesh, që sipas dihej duhet të marrin përgjigje për të qartësuar qytetarët. Sipas tij, qeveria e ka për detyrë të jetë transparente dhe t’iu japë detaje qytetarëve se për çfarë përdoren paratë që i jepen shtesë një sektori të caktuar. Sipas Braçes, asnjëherë nuk bëhet e ditur se ku shkojnë paratë që nuk përdoren për një pikë që ishin paracaktuar.
“Në fund të nëntorit sa është realizimi i investimeve publike me financim të brendshëm dhe të huaj? Vlera e investimeve shkon në 1.4 miliardë dollarë, mund të më thoni nëse kjo shumë do të jetë e ezauruar deri në fund të vitit? Nëse investimet nuk realizohet çfarë do të ndodh me të ardhurat e parashikuara? Në fund të nëntorit në ca mase është realizuar deficiti? A parashikoni që deficiti të bjerë më poshtë se 6.9%?Sa është fatura e rindërtimit deri më tani dhe sa miliardë do na duhet për ta mbyllur plotësisht procesin e rindërtimit? Do të shtoni 1.7 mld lekë për MIE, mund të dimë se sa do të jetë vlera e detyrimeve në 31 dhjetor? Shtesë 340 milionë lekë për Ministrinë e Bujqësisë për skemën e fermerëve, për cilën skemë dhe në ça niveli do të mbështeten fermerët këtë skemë?”, u shpreh Braçe.
Për shumicën e këtyre pyetjeve ish-zëvendëskryeministri Braçe nuk mori përgjigje në Komision, por që do i vihen në dispozicion nga Ministria e Financave me shkrim. Ndërkohë ai shtoi se ka in-eficencë në përdorimin e parave publike. Sipas tij, mungon transparenca ndaj taksapaguesve.
“Të realizohen investimet me 53% në fund të nëntorit tregon in-eficencë totale të përdorimit të parasë publike. Bëjmë gjithë këtë sakrificë, mbledhim paratë dhe nuk i përdorim atje ku kanë nevojë njerëzit sepse kanë paguar taksa e tatime, kanë mbajtur edhe peshën e borxhit e të deficitit dhe të mos përdorim paratë publike. Për ju do jetë problem i madh sepse për të realizuar këto shpenzime do të paguani 60-70 miliardë lekë deri në fund të këtij muaj dhe kur inflacioni ka shkuar 3.1% imagjinojeni vetë sesa do të jetë ndikimi dhe ky është shqetësimi real i ngritur nga Banka e Shqipërisë dhe FMN-ja”, tha Braçe, duke i kërkuar qeverisë që t’i përdor këto fonde në sektorë që kanë vërtetë nevojë.
Discussion about this post