Në fund të seancës së përbashkët mes dy Kuvendeve të Shqipërisë dhe Kosovës, e mbajtur sot në Prishtinë, u miratua deklarata e përbashkët nga deputetët e dy parlamenteve.
Kryetari i Kuvendit të Kosovës, Glauk Konjufca, lexoi deklaratën në fund të takimit, duke e vënë theksin tek uniteti për progres mes dy vënëve tona.
“Kjo është ajo që na ka sjellë këtu dhe na ka bërë fitimtarë në çdo udhëkryq nëpër të cilin kemi kaluar dhe kështu mendoj do të jetë gjithmonë me kombin shqiptar”-theksoi Konjufca.
Deklarata e përbashkët e vendos theksin te qëllimi i mbledhjes është koordinimi i axhendës kombëtare për realizmin e objektivave tona strategjike, anëtarësimin e Shqipërisë në BE brenda kësaj dekade, integrimin euroatlantik të Kosovës, anëtarësimin në NATO dhe BE dhe njohjen përfundimtare të Kosovës si realitet i pakthyeshëm gjeopolitik, mbrojtjen e të drejtave të shqiptarëve si dhe rritjen e kontributit të faktorit shqiptar për zhvillim, për demokratizim për paqe dhe për siguri në rajon dhe më gjerë.
Ai u shpreh se, “sa i përket kësaj seancë konsideroj që në çdo moment historik dhe të vështirë nëpër të cilat ka kaluar kombi ynë mospajtimet kanë qenë të pranishëm dhe idetë e kundërta, mendimet e ndryshme etj. Mendime të ndryshme kishte dhe në Lidhjen e Prizrenit kur u mbajt ajo. Studiuesit edhe historianët na i kanë sjellë ato, të gjitha kontradiktat e mundshme dhe të gjitha mospajtimet. Mospajtime kishte dhe në shpalljen e Pavarësisë së Shqipërisë. Kishte nga ata që e kundërshtonin dhe i dimë të gjitha ato dhe pastaj edhe në të gjitha fazat e rëndësishme nëpër të cilat kaloi kombi ynë”.
Por, theksoi ai, “arsyeja pse qëndrojmë këtu dhe më të fuqishëm se kurrë është vetëm një arsye. Arsyeja është se nëpër çdo sfidë dhe kontradiktë nëpër të cilën kemi kaluar ka ngadhënjyer gjithmonë ai opsioni kryesor. Dhe opsioni kryesor është opsioni i unitetit dhe opsioni i progresit, i ecjes përpara. Dhe kjo është ajo që na ka sjellë këtu dhe na ka bërë fitimtarë në çdo udhëkryq nëpër të cilin kemi kaluar dhe kështu mendoj do të jetë gjithmonë me kombin shqiptar”.
“Të dy Kuvendet e konfirmojnë nivelin strategjik të bashkëpunimit dypalësh. Në tërësinë e marrëdhënieve që të dy vendet kanë dhe zhvillojnë ën rajon, marrëdhëniet ndërmjet Shqipërisë dhe Kosovës e kanë reciprokisht rëndësinë parësore. Sfidat e Kosovës janë edhe sfidat e Shqipërisë dhe sukseset e Kosovës janë edhe të Shqipërisë dhe anasjelltas.
Marrëveshja mes dy Kuvendeve, nënshkruar në shtator të vitit 2022 ka institucionalizuar bashkëpunimin tonë he i ka dhënë dhe një mbështetje të re shtytëse bashkëpunimit mes qeverive dhe institucioneve tona dhe forcimit e komunikimit ndër njerëzor dhe lidhjeve mes qytetarëve të të dyja vendeve”, thuhet në deklaratë.
Rama dhe Kurti firmosin marrëveshjen e bashkëpunimit për Lojërat Mesdhetare 2030
Kryeministri Edi Rama dhe homologu i Kosovës, Albin Kurti, kanë zhvilluar një takim të shkurtër pas përfundimit të mbledhjes së përbashkët të Kuvendeve Shqipëri-Kosovë, mbajtur në Prishtinë.
Në takimin mes liderëve të dy vendeve, është nënshkruar Marrëveshja e Bashkëpunimit për organizmin e Lojërave Mesdhetare 2030.
Pas përfundimit të takimit, Rama dhe Kurti nuk kanë dhënë asnjë deklaratë për media, ndonëse janë pyetur mbi kohëzgjatjen e takimit.
Dy liderët, Rama dhe Kurti mbajnë fjalët përkatëse në Parlamentin e Kosovës, ku përsëritën nevojën për të qenë pjesë e familjes së madhe të BE-së.
Po ashtu, Rama dhe Kurti, nënvizuan se Kosova duhet gjithashtu të anëtarësohet sa më parë në NATO, si e vetmja rrugëzgjidhje për stabilitetin në rajon.
Discussion about this post