Me 13 vota pro dhe 6 kundër, është miratuar projektligji për “Bashkëqeverisjen” në Komisionin e Ligjeve.
Seanca e zhvilluar këtë të martë është shoqëruar me tensione dhe debate. Nënkryetari i PD-së Enkelejd Alibeaj ironizoi disa nene të projektligjit duke u shprehur se ai ka për qëllim propagandën. Gjithashtu deputeti demokrat ka kërkuar përmes një amendamenti të heqë një nen nga ky projektligj. Pasi u hodh në votë, mazhoranca e ka rrëzuar amendamentin e Alibeajt.
Në këtë pikë, deputeti i Partisë Demokratike Gazmend Bardhi akuzoi kryetaren e Komisionit, Klotilda Bushka, se manipuloi votat e socialistëve, duke i shtuar ato. Bushka e rrëzoi amendamentin e Alibeaj me 11 vota, ndërkohë që Bardhi e akuzoi se nuk ishin 11 duar të ngritura.
Ky ligj wshtw propozuar nga mazhoranca dhe qëllimi i tij është të krijojë kushtet për bashkëqeverisje me qytetarët nëpërmjet gjithëpërfshirjes së tyre në politikëbërje, garantimin e pjesëmarrjes së tyre në procedurat administrative vendimmarrëse dhe rritjen e përgjegjshmërisë dhe të llogaridhënies së administratës shtetërore, përmes platformës “Me ty për Shqipërinë që duam”.
Gjithashtu nxisë ndërveprimin ndërmjet administratës shtetërore dhe individëve, organizatave të shoqërisë civile, pavarësisht formës së tyre të organizimit, si dhe tregtarëve, shoqërive tregtare dhe çdo subjekti të së drejtës që kryen veprimtari tregtare me qëllim rritjen e rolit të tyre në përmirësimin e cilësisë së ofrimit të shërbimeve publike, si dhe ndërmarrjen e nismave, të projekteve ose të programeve të përbashkëta që kanë si qëllim përfshirjen e qytetarëve në bashkëqeverisje përmes platformës “Me ty për Shqipërinë që duam”.
