Në Bashkinë e Mirditës, e cila drejtohet nga demokratët, nuk është zbatuar urdhri i kryeministrit Edi Rama për shkarkimin e drejtuesve të njësive administrative.
Kryetari i Bashkisë, Albert Melyshi, e cilëson të padrejtë dhe antiligjor, pasi thotë se bie ndesh me kompetencat e pushtetit vendor. Sipas Melyshit, performanca e drejtorive dhe njësive administrative monitorohet çdo tre muaj.
“Në fakt urdhrat e kryeministrit në shumë bashki janë ndërhyrje thellësisht në kompetencat e pushtetit vendor. Nuk mundet në asnjë ligj, kryeministri të urdhërojë shkarkim drejtorësh apo administratorësh. Kjo është një procedurë që ndiqet në Bashki bazuar në performancën e secilit prej tyre apo në veprimet që kanë ata në shërbim të qytetarëve. Në Bashkinë e Mirditës kjo bëhet për një periudhë tremujore, çdo tre muaj. Secili që nuk ka realizuar detyrat patjetër shkon deri te shkarkimi,” tha z. Melyshi.
Pak javë më parë, kryeministri Rama, në një takim me kryetarët e bashkive, kërkoi shkarkimin e nënkryetarëve dhe drejtuesve të njësive administrative.
Por ky urdhër nuk ka gjetur zbatim as në Bashkinë e Lezhës, ku deri më tani nuk ka pasur lëvizje në këtë drejtim.
Discussion about this post