Të shtëna me armë zjarri në Mirditë, mbetet i vrarë një person (Emri)

Një atentat me armë zjarri është regjistruar mëngjesin e kësaj të enjte në Mirditë, ku është ekzekutuar Viktor Bardhi.

Sipas informacioneve paraprake, ngjarja ka ndodhur në fshatin Ndërfushaz, ku persona ende të paidentifikuar i kanë zënë pritë Bardhit dhe kanë hapur zjarr ndaj tij, duke e lënë të vdekur.

Sipas raportimeve, pas ngjarjes autorët janë arratisur në drejtim të paditur, ndërsa në Munaz është gjetur një makinë e djegur që dyshohet se u përket autorëve.

Sipas raportimeve, Viktor Bardhi është vëllai i Martin Bardhit, i cili u vra në një atentat të bujshëm në Rrëshen në shtator të vitit 2023. Policia ndodhet në vendngjarje dhe ka nisur hetimet për zbardhjen e rrethanave, ndërsa janë ngritur kontrolle dhe po punohet për identifikimin dhe kapjen e autorëve.

Vrasja e sotme rikthen në vëmendje historikun e përplasjeve të përgjakshme që kanë tronditur prej vitesh Mirditën, ndërsa hetuesit pritet të verifikojnë edhe nëse ekziston ndonjë lidhje mes ngjarjes së sotme dhe atentatit ndaj Martin Bardhit.

Kush ishte Martin Bardhi?

Martin Bardhi ka qene person i njohur për drejtësinë shqiptare, pasi ka qene një nga personat që ka tentuar të vrasë Saimir Recin, nipin e Kastriot Reçit, edhe ky i eliminuar më parë.

Shkak i konfliktit mes Enrik Bardhit (djalit të Martin Bardhit) dhe Saimir Reçit ishte bërë parakalimi me makinë në rrugën kryesore të qytetit, që është shoqëruar dhe me të shtëna me arme zjarri.

Saimir Reçi dhe Enrik Bardhi kanë zbritur nga automjetet dhe janë përplasur fizikisht me njëritjetrin në mes të qytetit.

Më pas, Enrik Bardhi ka shkuar në banesë dhe së bashku me të atin, Martin Bardhi kanë marrë një armë zjarri pistoletë dhe kanë qëlluar në drejtim të automjetit me të cilin lëvizte nipi i Kastriot Reçit, pronarit të televizionit lokal në Lezhë, i vrarë me snajper në muajin janar të vitit 2021 në Rrëshen.

Si u vra Martin Bardhi në 2023

Martin Bardhi, i njohur edhe si Marjan Marku, u ekzekutua mëngjesin e 26 shtatorit 2023 në Rrëshen. Ai sapo ishte liruar nga qelia, ku kishte qëndruar prej disa muajsh pas një tentative të dështuar sulmi me armë në qytet. Pak kohë pas lirimit, Bardhi u ul në lokalin e tij, pranë Komisariatit të Policisë Mirditë. Por qëndrimi në ambientin që e konsideronte të sigurt rezultoi fatal për të. Një automjet tip “Jeep Grand Cherokee”, që dyshohet se u përdor nga autorët, u pa disa herë pranë lokalit të viktimës përpara atentatit. Sipas të dhënave të dosjes hetimore, mjeti kaloi pranë zonës në oraret 09:36, 10:18, 10:24 dhe 10:39, ndërsa në momentin e fundit u krye sulmi.

Autorët hapën zjarr në drejtim të tavolinës ku ndodhej Martin Bardhi, duke e lënë atë të vdekur në vend. Nga breshëria e plumbave mbetën të plagosur edhe tre persona të tjerë që ndodheshin me të. Në vendngjarje u gjetën dhjetëra gëzhoja të kalibrit 7.62 mm, ndërsa hetuesit konstatuan edhe dëmtime të shumta të shkaktuara nga predhat e armës së zjarrit.

.