Vllaznia përballet nesër me Egnatian dhe para mediave ka dalë trajneri Mirel Josa, që do ta ketë ndeshjen e tij të parë në stolin e kuqebluve në këtë rikthim të tretë.
“Ndeshja me Egnatian është e vështirë, për më tepër që ndaj kësaj skuadre Vllaznia nuk ka fituar asnjëherë gjate këtij sezoni. Ajo është duke menduar për ndeshjen e play-out, por për ta përgatitur atë ndeshje, duhet të jetë e fokusuar dhe prandaj besoj se do të vije të luajë lirshëm në Shkodër.
Unë e kam parë skuadrën e Vllaznisë gjatë këtyre ditëve. Mendoj se do të ndryshojmë disa gjëra dhe këto ndryshime nuk janë thjesht tek emrat, por edhe mënyra si do të luajmë. Ne do të bëjmë punën tonë për të kërkuar dy fitore në dy ndeshjet e fundit të kampionatit dhe për të shpresuar deri në fund për sigurimin e një vendi që na çon në Europë.
Vllaznia nuk është Latifi, ajo ka 20 e ca lojtarë. Latifi ka cilësi të mira, që unë i njoh. Unë shoh grupin. Kam parë Latifin, Da Silven, Aralicen e të tjerë. Mua nuk më intereson individi, por grupi, por kuptohet që duam t’i kemi secilin prej këtyre lojtarëve në lartësinë e duhur për t’i shërbyer skuadrës.
Nuk kam mesazh për tifozët. Shkodra ka tifozerinë që e njeh më mirë se çdo tifozeri tjetër futbollin nga ana profesionale. Shpresojmë t’ia bëjmë atyre pasditen e nesërme të këndshme, me një rezultat pozitiv”, deklaroi trajneri Josa.
Discussion about this post