Paratë e taksapaguesve po shpërdorohen nga Agjencia Kombëtare e Shoqërisë së Informacionit (AKSHI), e cila ka centralizuar çdo investim në sektorin IT. Në këtë kuadër, drejtoresha Mirlinda Karçanaj nuk ka kursyer as një sistem të rëndësishëm siç është Arsimi, i cili i ka laboratorët në situatën më të keqe. Qeveria me AKSHI-n kanë propozuar laboratorët SMART në shkolla, të cilët po rezultojnë një skemë për të përvetësuar fonde. Drejtoresha po i shkon deri në fund tenderit me disa lote që shkon mbi 16.5 milionë euro, edhe pse abuzimet në këtë procedurë janë bërë objekt i hetimit të SPAK.
Kujtojmë se në vitin 2023, AKSHI dhe Ministria e Arsimit dhe Sportit nënshkruan planin për zbatimin dhe monitorimin e performancës së laboratorëve SMART në shkollat e arsimit bazë 9-vjeçar. Pas nënshkrimit të këtij plani që do të zgjasë deri në vitin 2026, AKSHI ka nisur me tenderat, të cilët i ka vetë në dorë.
Më datë 26 mars 2024, agjencia ka hapur garën për tenderin me objekt ‘Implementimi i laboratorëve SMART- për MAS”, me fond limit 388 milionë lekë. Sipas Open Data Albania, fituese është firma AlbaScan në pronësi të Elton Jorgjisit , por kontratat nuk është bërë ende publike.
Pra, akoma nuk dihet sa laborator do të implemetohen me këtë tenderë dhe ku saktësisht. AKSHI ka preferuar që të mbajë të fshehtë kontratën deri më tani. Gjithsesi ne vazhdojmë të theksojmë se po ikin 388 milionë lekë drejt një kompanie që favorizohet për qëllime korrupsioni.
Shkëlqimi i AlbaScan
Albascan u krijua në shkurt të vitit 2017 nga Sokol Cane dhe Etmira Dashi. Të dy këta aksionerë zotëronin nga 50 për qind. Gjatë kohës që ishte në pronësinë e tyre kompania mbeti një biznes i vogël me xhiro të papërfillshme. Ngjitja e saj erdhi në vitin 2019, kur u ble nga Elton dhe Elision Jorgjis për 150 mijë lekë. Sokol Cane që e shiti kompaninë për 150 mijë lekë është ortak i Andi Gjiknurit, në një kompani tjetër. Gjiknuri ka trashëguar nga i ati biznesin e ndërtimit dhe lidhjet me ish-ministrin Damian Gjiknuri. Ky i fundit është akuzuar nga opozita se i dha kushëririt statusin e investitorit strategjik për të marrë resorte buzë detit, por ministri në atë kohë e mohoi duke u shprehur se “Andin nuk e kam lidhje familjare”.
Menjëherë sapo u ble nga dy pronarët e rinj, xhiro e kompanisë kërceu në 110 milionë lekë nga 19 milionë që kishte qenë në vitin 2018. Vitet kalonin dhe biznesi i “AlbaScan” rritej në mënyrë progresive.
Theksojmë se AlbaScan vazhdon të marrë vazhdimisht tendera nga AKSHI, megjithë lajmet e ditëve të fundit se SPAK ka nisur hetimet në lidhje me prokurimin e laboratorëve SMART.
11 miliardë lekë vetëm në janar 2024
Por, ky është tenderi i dytë në kuadër të këtij plani, sepse në 29 janar 2024, AKSHI ka kryer një tender me objekt “Implementimi i laboratorëve SMART- për Ministrinë e Arsimit dhe Shkencës”, ku fondi limit ishte 16 miliardë lekë. Edhe kjo faturë shkoi në llogari të shoqërisë “Albscan”, me ofertën 11 miliardë lekë.
E qartë që “AlbaScan” e ka nënshkruar kontratën e fshehtë me drejtoreshën, dhe derisa të mbyllet ky plan do të jetë fituese e çdo tenderi pasardhës.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post