Misteri/ Tragjedia e Liqenit të Banjës, dyshimet e para

Një ngjarje e rëndë ka ndodhur pasditen e sotme në Liqenin e Banjës në Gramsh, ku 4 persona humbën jetën.

Shefi i zjarrfikësve tha se me siguri asnjë prej viktimave nuk dinte not dhe kanë tërhequr njëri tjetrin.

“Ky liqen ka disa gropa, që pësojnë shkëputje të menjëhershme, ndaj mendoj se fatkeqësisht ata kanë tërhequr njëri-tjetrin. Por asnjë prej viktimave nuk ka ditur not”, tha shefi i zjarrfikësve, në përfundim të operacionit ku u gjetën 4 trupat e pajetë.

Në vijim ai shtoi se një ditë më parë zona është patrulluar nga ekipet zjarrfikëse, ndërsa shtoi se zakonisht në këtë liqen nuk lahet njeri, aq më tepër nga personat që nuk dinë not.

Viktimat e tragjedisë së Liqenit të Banjës janë babai dhe dy djemtë, si dhe një kushëri i tyre. Arben Zogu 46 vjeç dhe dy djemtë e tij, Rubens Zogu 19 vjeç e Esti Zogu 14 vjeç, si dhe kushëriri i tyre Melsi Zogu 20 vjeç, kishin shkuar në Liqenin e Banjës për tu larë, ndërsa nuk arritën dot të dilnin në breg.

Policia u njoftua nga familjarët, pasi personat që u mbytën në Liqenin e Banjës, nuk po i përgjigjeshin në telefonat e tyre celularë.

“Njoftuam policinë, nuk po lidheshim dot me familjarët tanë. Na thanë do shkojmë dhe nuk vonohemi, maksimumi 1 orë. Kemi njoftuar policinë, nuk e denim se në çfarë vendi do të shkonin”, tha një prej familjarëve të viktimave.