Mjekët e spitalit të Fierit, të cilët dolën sot në mbështetje të kolegëve që u përfshinë në konflikt me pacientin Ardit Klima, kanë deklaruar se audioja e publikuar në emisionin ‘stop’ është e manipuluar.
“Ju bëj thirrje ju si media që të sensibilizoni prokurorinë, sepse audio është e manipuluar. Në lidhje me videon ka shumë elementë, ku vetë Ardit Lima me paramendim ka bërë simulime të tepërta, ku ulërimat nuk përputheshin me atë çka ndodhte realisht”, tha njëri prej mjekëve
Gjatë deklaratës për mediat, një tjetër mjek tha se nëse kolegët do të pezullohen nga detyra, ata do të japin dorëheqjen.
“Nëse kolegët tanë pezullohen, unë i pari do të jap dorëheqjen. Nuk mund të punojmë nën këtë lloj dhune. Nëse shteti na sjell në punë të na dalë për zot”, tha mjeku tjetër.
“Unë si mjeku më i vjetër, prej 38 vitesh pune nuk jam përfolur për dhunë psikologjike dhe fizike. Nuk u kujtova tani unë që jam në prag të pensionit për dhunë fizike. Përmendem: O Luli të njoha. Unë vajta pothuajse në fund të ngjarjes sepse dëgjova ulërima. Kur u futa brenda po ulërinte Arditi. I thashë çfarë ke, qetësohu? Ngaqë ai nuk më ktheu përgjigje unë nuk fola më. Kolegët e mi po e mbanin, më pas erdhi policia. Kur u ngrit në këmbë ai tha: Luli të njoha, je çuni i lagjes. Policia erdhi menjëherë dhe e mori. Unë kaq pashë që ai përpiqej të shpëtonte dhe ishte i axhituar”, shtoi një koleg tjetër.
Videoja teksa dhunohej pacienti u publikua pak ditë më parë nga emisioni investigativ ‘Stop’. Emisioni ka siguruar ekskluzivisht audio-regjistrimin e dhunës që 4 mjekë të spitalit të Fierit kanë ushtruar ndaj qytetarit Ardit Klima. Ky i fundit është arrestuar disa ditë më parë për dhunë ndaj bluzave të bardha. Në material dëgjohet sesi mjeku neurolog Enver Halili bashkë me disa kolegë të tij mjeku i Hemodinamikës, Ndriçim Kallashi dhe një tjetër i quajtur Luli, e kanë rrahur dhe fyer Arditin.
