Mjeku infeksionit, Arjan Harxhi, ka folur sot gjatë një interviste televizive në lidhje me sëmundjen e SIDAS në vendin tonë. Ai deklaroi se kjo shifër nuk mund të konsiderohet e lartë, ndërsa u shpreh se në këto 5-6 vitet e fundit shohim një ecuri konstante, pasi numërohen rreth 90-100 raste të reja. Ndër të tjera ai sqaroi se në Shqipëri rruga e transmetimit mbetet ajo përmes raportit seksual dhe kjo më shumë përmes rrugës biseksuale. Ndërsa lidhur me interesin e popullatës për tu testuar, Harxhi u shpreh se numri është shumë i vogël teksa sqaroi se duhet të rriten mundësitë që personat që ndjehen të rrezikuar të vetëtestohen.
“Numri është shumë i vogël në këto 90 raste, një pjesë e vogël vjen nga testimi vullnetar. Ndërgjegjësimi është i ulët për këtë arsye OBSH në strategjitë e tyre ndërtojnë programe të veçantë për testimin e grupeve në risk. Nga ana tjetër duhet të përmirësohet aksesi për testin e HIV dhe nga ana tjetër duhet të jemi më aktiv të mënyrave të tjera të testimit siç mund të jenë testet e shpejta dhe me metoda të thjeshta dhe në kushte shtëpie. Të rriten mundësitë që personat që ndjehen të rrezikuar të vetëtestohen. Duke testuar, diagnostikohet në kohë dhe kjo ka sukses në terapinë dhe uljen e riskut. Sepse një person që trajtohet nuk është më infektues më të tjerët”, tha ai. Ndër të tjera ai shtoi se për fat të keq edhe pse kanë kaluar disa dekada nga fillimi i kësaj pandemia kjo sëmundje vazhdon të jetë shumë stigmatizuar dhe diskriminuar, çka rëndon pasojat për personat e prekur.
Discussion about this post