Epidemiologu Erion Dasho ka denoncuar vazhdimisht çmimet marramendëse të tamponëve dhe testeve PCR në vendin tonë, duke i krahasuar me çmimet në vende të tjera. Përmes një postimi në Facebook ai shkruan se që nga gushti i viti të shkuar dhe deri më tani spitalet private dhe ato publike në vend abzuojnë me çmimet.
Duke marrë si shembull Gjermaninë, ku teste shiten 50—80 cent në supermarkete, Dasho e quan vjedhje të hapur mënyrën se si funksionin testimi në Shqipëri. Prandaj, ai ka bërë thirrje që organet përgjegjëse të hetojnë dhe të mos lejojnë vazhdimin e këtij abuzimi. “Gjatë gati dy vjetëve të pandemisë, nuk kam folur vetëm për Gjermaninë ku testimi ofrohej falas për çdo person si në sektorin publik dhe në atë privat. Apo ku sot testi blihet në supermarket për 50 deri 80 cent. Kam folur edhe për Nepalin ku testi PCR ofrohej me çmim fiks 10 dollarë në sektorin publik dhe 20 dollarë në sektorin privat. Ku infermieri shkon edhe në shtëpi për të marrë tamponin kundrejt çmimit 25 dollarë. Rezultati del online brenda 24 orëve (në 90% të rasteve brenda 8 orëve).
Kush përfiton nga çmimet spekulative në Shqipëri?! A munden spekulantët t’i “gëzojnë” të vetëm ato miliona euro që shqiptarët harxhojnë çdo muaj për testimin?! A do të hetojë dikush për kasaphanën jo vetëm me jetët, por edhe me ekonominë e shqiptarëve?! Koha do ta tregojë! Shpesh drejtësia vonon por nuk harron”, u shpreh ai.
Më parë Dasho i ka kërkuar qeverisë që të mundësojë testim falas për studentët që nuk duan të vaksinohen.
Discussion about this post