Në ditën Botërore të Mjedisit, deputeti demokrat Belind Këlliçi ka ironizuar nismën e qeverisë për ndalimin e përdorimit të qeseve plastike duke thënë se qëllimi i vërtetë është rritja e pazarit të plastikës.
Sipas tij, ndërtimi i Stadiumit ka rritur ndotjen nga trafiku, ndërsa ironizon Erion Veliaj duke thënë se e mbyti Tiranën me parqe dhe lulishte.
“Qeveria ligjëroi ndalimin e përdorimit të qeseve plastike. “Një epokë e re e Shqipërisë patriotike” e quajti sloganisti Rama. Në Shqipërinë patriotike që keqqeveris Rama, qeset plastike jo vetëm që janë ende në përdorim por kushtojnë më shtrenjtë. Ky ishte qëllimi i vërtetë, me rrit pazarin e plastikës. Sot është Dita Botërore e Mjedisit. Vendi ynë i ka paraprirë festimeve që me ndërtimin e Arenës Kombëtare. Për të eliminuar ndotjen nga trafiku do e ndërtojmë stadiumin në truallin ekzistues dhe jo në rrethina, tha asokohe kryebashkiaku i Tiranës. Ndryshe nga qendrat urbane perëndimore, Tirana e ka stadiumin në zemër të saj, se ndryshe ç’vlerë do të kishte kulla në periferi! Kryebashkiaku i kryeqytetit më të ndotur të Europës e mbyti Tiranën me parqe e lulishte dhe nuk dha asnjë leje ndërtimi për kulla. Se socialistët e kooptuar si Veliaj i mbajnë premtimet elektorale. Mjerë Tirana!”, shkruan deputet i PD.
Discussion about this post