Një aksident është regjistruar pasditen e sotme në aksin nacional Berat-Skrapar, në fshatin Vërtop. Mjeti tip Audi, që drejtohej nga një 28-vjeçare është rrëzuar nga ”Ura e Vërtopit” dhe ka përfunduar disa metra poshtë në zhavorrin e lumit Osum.
Mësohet se, si pasojë e rrëzimit drejtuesja e mjetit Anxhela Ibra 28-vjeçe, është plagosur rëndë, ndërkohë që pasagjeri që udhëtonte me të nuk ka pësuar lëndime.
E plagosura është transportuar fillimisht drejt Spitalit Rajonal të Beratit ku, pasi ka marrë mjekimin e parë është transportuar me urgjencë drejt Spitalit të Traumës në Tiranë.
“Në aksin rrugor Berat – Poliçan, në vendin e quajtur Ura Vërtopit, një mjet ka dalë nga rruga me drejtuese shtetasen A.I, 28 vjeçe, banuese në Poliçan.
Për pasojë drejtuesja e mjetit ka pësuar dëmtime dhe po transportohet për në Spitalin e Traumës Tiranë, aktualisht jashtë rrezikut për jetën. Grupi hetimor po punon për zbardhjen e shkaqeve të aksidentit”, njofton policia.
