Deputeti i PD Dashnor Sula, shprehet se moslikujdimi i faturave të energjisë elektrike nga ana e Ujësjellësave nënkupton kosto shtesë për buxhetin e shtetit, gjë që ka rritur subvencionet në këtë drejtim.
Sipas tij “kryeministri nuk mund të prek ujësjellësit”, por ka vendosur që sërish të rrjepë qytetarët duke rritur çmimin e energjisë duke rikthyer fashat për të kompensuar dështimin e ujësjellësve dhe institucioneve të tjera shtetërore!
Statusi i plotë:
“M’ka çuar nona me la gojën”
Shprehja “M’ka çuar nona me la gojën”, i përshtatet fiks mbledhjeve propagandistike të kryeministrit. Ju kujtohet pak muaj më parë një mbledhje e kryetarit të qeverisë qendrore me kryetarët e bashkive?
Po lajmet bombastike: Rama i bën dush të ftohtë kryebashkiakëve?
Në mbledhjen me kamera kryeministri i kërkonte në mënyrë urdhërore të zgjedhurve lokal që të shlyenin borxhet e krijuara nga mospagimi i energjisë elektrike.
Por duket se presioni i kryeministrit ka qenë vetëm për efekt propagandistik dhe pas mbledhjes u ka rrahur shpatullat dhe u ka thënë që të vazhdojnë kështu. Le të mos paguajn faturat mjafton të mbajnë militant në punë. Ky konkluzion del duke parë rezultatet.
Borxhet e ujësjellësve ndaj Operatorit të Shpërndarjes së Energjisë Elektrike për fatura të papaguara u rritën sërish gjatë 6 muajve të parë të këtij viti. Sipas informacioneve zyrtare në fund të muajit Qershor vlera e faturave të palikujduara arriti në rreth 18.1 mld lekë. Kjo është shifra më e lartë e akumuluar ndonjëherë nga institucionet jobuxhetore, të paktën që nga vitin 2010, kur gjithsesi borxhi ishte ndjeshëm më i ulët se vlerat e sotme me rreth 2.7 mld lekë të papaguara.
Periudha, kur borxhet e ujësjellësve ishin në nivele më të ulta është Maj – Korrik 2015, me 1.5 – 1.9 mld lekë, e ndikuar nga fshirja e detyrimeve të prapambetuara që u ndërmor në vitin 2014. Ndërkohë që, pas Korrikut 2015 tendenca për të mos paguar energjinë e konsumuar ka qenë vetëm në rritje, për të arritur në rekodin e muajit qershor 2022.
Moslikujdimi i faturave të energjisë nënkupton dhe kosto shtesë për buxhetin e shtetit, që ka rritur subvencionet në këtë drejtim. Vetëm gjatë vitit 2021, buxheti i shtetit transferoi pranë shoqërive të ujësjellësve 380 mln lekë, ndërkohë që për vitin 2020 këto subvencione ishin 230 mln lekë apo 150 mln lekë më pak. Kaq i madh është korrupsioni në këto institucione që punësojnë patronazhistë saqë megjithë paratë që i jep qeveria qëndrore, sërish krijojnë borxhe të mëdha.
Sigurisht, kryeministri nuk mund të prek ujësjellsat, por ka vendosur që sërish të rrjep qytetarët duke rritur çmimin e energjisë duke rikthyer fashat për të kompensuar dështimin e ujësjellësave dhe institucioneve të tjera shtetërore!
Discussion about this post