Të tmerruar e kanë mbyllur mbrëmjen e shkuar qytetarët në Greqi nga tërmeti i fuqishëm, që u ndje edhe në vendin tonë. Pamje të ndryshme kur duket frika dhe kaosi janë publikuar ditën e sotme nga Follorina, qyteti ku lëkundjet u ndjenë më shumë.
Lëkundjet e tokës nisën pak përpara mesnate të dielën mbrëma 2 km larg Follorinës me një thellësi të vatrës prej 14.1 km. Në ato momente, banorët në panik kanë dalë me nxitim nga banesat e tyre dhe pjesa më e madhe të frikësuar kanë kaluar natën jashtë në makina.
“Në fillim ndjemë librarinë afër shkallëve që tundej dhe brenda sekondës librat ranë njëri pas tjetrit,” është shprehur një qytetar. Ndërkohë, mediat në vend kanë publikuar pamje të momentit kur nisin dridhjet e tokës, të kapura nga kamerat e sigurisë nëpër banesa.
Lëkundjet u ndjenë në mënyrë të konsiderueshme edhe në vendin tonë, sidomos në juglindje. Reagimet e qytetarëve qenë të shumta në mediat sociale, por edhe në aplikacionin e Qendrës Sizmologjike Evropiano-Mesdhetare.
Discussion about this post