Zyra e Prokurorit të Bosnjë e Hercegovinës ka hapur një hetim kundër presidentit të Republikës Srpska, Milorad Dodik, pasi ai mohoi gjenocidin. Lajmi është konfirmuar nga ky institucion për Radion Evropa e Lirë. Sipas ligjit, pas inicimit të rastit, Zyra e Prokurorit të Bosnjë e Hercegovinës kryen hetim, pas së cilit prokurori i rastit vendos nëse do të ngrejë aktakuzë.
E fill pas kësaj procedure, Gjykata e Bosnjë e Hercegovinës konfirmon ose hedh poshtë aktakuzën.
“Gjenocidi nuk ka ndodhur atje, të gjithë ne në Republikën Sërpska e dimë këtë,”- tha Dodik lidhur me Srebenicën, gjatë një konference për media në Banja Llukë më 21 shkurt.
Por kjo nuk është hera e parë që Dodik e mohon gjenocidin që kur ish-përfaqësuesi i Lartë në Bosnjë dhe Hercegovinë, Valentin Inzko, miratoi Ligjin për ndalimin e mohimit të gjenocidit në fund të korrikut 2021. Gjatë gjenocidit në Srebrenicë në korrik 1995, forcat e Ushtrisë së Republika Srpska (VRS) vranë rreth 8 000 burra dhe djem, e po ashtu më shumë se 25 000 gra.
Masakra është cilësuar si mizoria më e rëndë në Evropë që prej përfundimit të Luftës së Dytë Botërore, ndërsa Gjykata Ndërkombëtare e Hagës e ka njohur si gjenocid.
Ende sot, mbi 1 200 viktima të masakrës së Srebrenicës mbeten ende të zhdukura. Për masakrën, ish-udhëheqësi i serbëve të Bosnjës, Radovan Karaxhiç, është dënuar me burgim të përjetshëm, ashtu si edhe ish-udhëheqësi ushtarak në Bosnje, Ratko Mlladiç.
Discussion about this post