Nëntë turistë të huaj janë shpëtuar nga Policia Kufitare dhe Njësia Policore Detare gjatë dy operacioneve të zhvilluara këtë të hënë në Himarë dhe Ksamil, pasi rrezikuan jetën në det.
Rasti i parë u regjistrua në zonën e Filikurit në Himarë, ku një turist spanjoll mbeti në vështirësi pasi kajaku me të cilin po lundronte u fundos.
Pas njoftimit të dhënë nga e fejuara e tij, Policia Kufitare organizoi menjëherë operacionin e kërkim-shpëtimit, duke e lokalizuar dhe nxjerrë nga uji në gjendje të mirë shëndetësore. Më pas ai u transportua në siguri pranë Pikës së Kontrollit Kufitar në Himarë.
Një tjetër ndërhyrje u zhvillua në Ksamil, ku tetë turistë brazilianë, pjesëtarë të së njëjtës familje, kërkuan ndihmë pasi skafi plastik me të cilin po lundronin rrezikonte të fundosej në zonën pranë “Tre Ishujve”.
Falë reagimit të shpejtë të efektivëve, të cilët përdorën një gomone dhe një jet ski, të gjithë turistët u nxorën në siguri, ndërsa mjeti lundrues u rimorkua deri në plazhin “Puerto Rico” në Ksamil.
Të dy operacionet përfunduan pa pasoja për jetën apo shëndetin e turistëve, të cilët falënderuan efektivët për profesionalizmin dhe ndërhyrjen në kohë.
Policia Kufitare u ka bërë apel të gjithë pushuesve dhe drejtuesve të mjeteve lundruese që të respektojnë rregullat e sigurisë në det, të përdorin pajisjet shpëtuese dhe të shmangin lundrimin në zona që mund të paraqesin rrezik.
Discussion about this post