Në Oran të Algjerisë po mbahen Lojërat e 19 Mesdhetare dhe kësaj radhe kanë nisur me këmbën e mbarë për Shqipërinë, pasi dy sportistët me origjinë nga Çeçenia, Zelimkhan Abakarov dhe Islam Dudaev, që përfaqësojnë Shqipërinë, kanë marrë medaljet e para. Në një prononcim për mediat, Zelimkhan është shprehur se ndihet i kënaqur për medaljen dhe se synimi i tij është të kualifikohet dhe të fitojë medalje për Shqipërinë në Lojërat Olimpike të Parisit në 2024.
“Sigurisht jam shumë i kënaqur për fitoren e medaljes së artë për Shqipërinë, për veten time, janë emocione pozitive sepse bëhet fjalë gjithnjë për medalje të artë. Jam shumë krenar që të garoj për Shqipërisë dhe të përfaqësoj këtë vend në arenën ndërkombëtare. Sigurisht Lojërat Olimpike janë ëndrra e çdo sportisti, kështu që synimi ynë është të kualifikohemi dhe të fitojmë medalje për Shqipërinë në Lojërat Olimpike të Parisit në 2024” – thotë Zelimkhan.
Ndërsa Islam Dudaev, është shprehur se medaljen e ka fituar duke u ndeshur në 2 kategori më të larta dhe jo në peshën tij të zakonshme.
“Arrita të fitoj medalje bronzi, u ndesha në 2 kategori më të larta, jo në peshën time të zakonshme. Jemi krenarë që kemi shansin të garojmë për Shqipërinë, jemi krenarë që jemi pjesë e këtij vendi. Ne do të bëjmë gjithçka për të fituar një medalje olimpike për Shqipërinë” – tregon Islam Dudaev.
Këta do të jenë edhe sportistët që do të marrin pjesë në Lojërat Olimpike të Parisit në 2024.
Discussion about this post