Morën valixhet me drogë në kufi, arrestohen 2 femra

Nuk kanë të ndalur ngarkesat me drogë të kapura në kufirin greko-shqiptar.

Nga një operacion i policisë greke ditën e sotme në orët e para të mëngjesit në Igumenicë ëhstë ndaluar një automjet që ishte ngarkuar në kufirin e gjelbër.

Brenda në mjet kanë qënë dy shtetase greke të cilat kishin marrë dy çanta dhe dy valixhe në kufi nga shtetas shqiptarë.

Brenda tyre janë gjetur dhe sekuestruar 37 pako me 40 kg 464 gram marijuanë. Një prej femrave i është gjetur dhe një sasi e vogël heroine.

Dy femrat e kanë marrë mjetin me qera në Athinë dhe dje pasdite kanë ardhur në kufirin greko-shqiptar ku janë ngarkuar me drogë. Gjithashtu u janë sekuestruar dhe 220 euro.

Droga e kapur arrinte vlerën e rreth 101 mijë euro.

Prej fillimit të vitit, policia greke ka evidentuar dhe kapur 5 raste të trafikut të drogës nga Saranda në Igumenicë dhe ka sekuestruar 276 kg 264 gram marijuanë me vlerë totale nëse do shitej në Greqi rreth 690 mijë euro.

Ndërsa në vende të ndryshme të Greqise prej fillimit të vitit janë kapur rreth 750 kg marijuanë e cila dyshohet se vinte nga Shqipëria.