Një denoncim i bërë nga Partia Demokratike këtë të premte ngre dyshime për klientelizëm në qarkullimin e pasurive publike brenda kupolës së pushtetit si dhe audiencën reale në takimet e kreut të qeverisë me diasporën.
Genta Vangjeli zbuloi se një person i pranishëm në takimin e Ramës në Milano, i cili thotë se është emigrant në Itali prej 1 viti, është vëllai i kryebashkiakut të Fierit Armando Subashi. Në një deklaratë nga selia blu, zëdhënësja e Anti-Korrupsionit në Partinë Demokratike publikoi dokumente që vërtetojnë se personi në fjalë ka përfituar nga qeveria Rama 12 507 m² tokë për ta përdorur për qëllime biznesi, me një qira simbolike prej 1 Euro.
“Për të kuptuar se kush janë ata që mbushin sallat në Athinë apo Milano dhe duartrokasin sikur Edi Rama të ishte Ed Sheeran do t’ju japim sot një shembull me zë dhe figurë. Edi Rama nuk i bie kitarës por ‘i bie stilolapsit’ me të cilin firmos ‘fap e fap’ VKM për njerëzit e pushtetit, të cilët mbushin më pas, bashkë me punonjësit e tyre, sallat e koncerteve të partisë. Kështu me anë të VENDIMIT Nr. 636 të 1 tetorit 2014 të Këshillit të Ministrave, Edi Rama firmosi miratimin për lidhjen e kontratës së qirasë me tarifën simbolike 1 euro/kontrata, ndërmjet Ministrisë së Zhvillimit Ekonomik, Tregtisë dhe Sipërmarrjes, si qiradhënës, dhe shoqërisë ‘Tur-Tekstil’ sh.p.k., si qiramarrës, për pasurinë ‘Ish-Ndërmarrja Gjeofizike, Patos’, me sipërfaqe të përgjithshme 12 507 m²”, tha Vangjeli.
Duke iu referuar të dhënave në Qendrën Kombëtare të Biznesit, tha se pronar i kompanisë së sipërpërmendur rezulton Eltjon Subashi. vëllai i Kryebashkiakut të Fierit Armando Subashi.
“Publikut, që më të drejtë nuk e njeh të vëllanë e kryebashkiakut, po ia kujtojmë më këtë video të shkurtër gjatë koncertit tallava të Edi Ramës në Milano para pak ditësh”, shtoi më tej, duke publikuar edhe pamjet (më poshtë).
“Zyra e Punës Fier është kujdesur që të paguajë edhe subvencione për kompaninë e vëllait të kryetarit Subashi. Sipas të dhënave të siguruara nga Spending Data Albania subjekti i kontratës 1 euro përfitoi prej Qershor 2015 deri Tetor 2017, 121 milion lekë prej Zyrës së Punës Fier. Kështu e mbështeti qeveria Rama edhe vëllain e kryebashkiakut të Fierit Armando Subashit, i cili, afërmendsh pas këtij nderi prej milionash nuk mund të mungonte në koncertin e bosit në Milano”, përfundoi Vangjeli.
Ndaj kryeministrit Edi Rama u depozitua në Prokurorinë e Posaçme një kallëzim penal pas takimit me emigrantë në Athinë, në kuadër të asaj që ai e cilëson “turit me emigrantë”. Sipas përfaqësuesve të opozitës, shkeljet ligjore të Ramës lidhen me fondet monetare, sipas tyre të shpërdoruara nga buxheti për këto aktivitete dhe detyrimin e administratës për të ndjekur fizikisht kryeministrin.
Discussion about this post