Një rast korrupsioni dhe shpërdorim detyre nga uniformat blu është konstatuar në Elbasan. Shërbimi për Çështjet e Brendshme dhe Ankesat ka vënë në pranga punonjësin e policisë N/Komisar K.O., 52 vjeç, me detyrë Specialist dhe Oficer i Policisë Gjyqësore për hetimin e aksidenteve në Sektorin e Qarkullimit Rrugor në DVP Elbasan.
Burime nga policia për gijotina.com bëjnë me dije se punonjësi i policisë në detyrën e oficerit të Policisë Gjyqësore për hetimin e aksidenteve rrugore, ai dyshohet se ka marrë ryshfet në vlerën 50.000 lekë gjatë hetimit të një aksidenti rrugor, ku mbetën të plagosur disa shtetas.
Arrestimi i oficerit u bë nga SHÇBA në bashkëpunim me Prokurorinë e Rrethit Gjyqësor Elbasan, në kuadër të procedimit penal të vitit 2021, ndjekur me metoda speciale të hetimit.
Deri tani nuk është bërë publik emri i tij, ndërsa ndodhet nën masën e sigurisë “Arrest me burg” të vendosur nga Gjykata e Rrethit Gjyqësor Elbasan.
Discussion about this post