Drejtori i përgjithshëm i Rrugores, Altin Qato, i ftuar në emisionin “Opinion” foli për aksidentin e ndodhur një ditë më parë në rrugën e Kavajës ku Ajas Sulejmani i cili po drejtonte automjetin nën efektin e lëndëve narkotike mori para familjen Konomi te vijat e bardha. Qato deklaroi se ndaj Sulejmanit tanimë rëndojnë akuzat për shkelje të rregullave të qarkullimit rrugor ndërkohë që pozita e tij rëndohet akoma më shumë për shkak të largimit nga vendi i ngjarjes.
“Skena duket qartë. Normalisht jemi para një ngjarje shumë të rëndë. Statusin që kanë dy familjarët me një fëmijë të mitur. Në pozicionin që ka ndodhur kjo ngjarje rrugore ku ka semaforë dhe kishte këmbësorë. Gjithmonë këmbësori prevalon. Në këtë rast jemi në rast krejt të kundërt. Është një ngjarje tepër e rëndë për shkak të pozicionit. Policia pasi ka marrë njoftimin, personi është arrestuar. Është përfshirë në shkelje të rregullave të qarkullimit. Është përfshirë edhe largimi nga vendi i ngjarjes. Janë bërë edhe veprimet administrative. I është hequr leja e drejtimit për 24 muaj” – tha Qato.
Qato gjithashtu tha se shoferi ka pasur mungesë vëmendje në drejtimin e automjetit. Qato tregoi se në momentin e parë, Sulejmani ka dashur të flasë vetëm nën praninë e avokatit dhe është shmangur të japë shpjegimet e para.
“Ne kemi një procedurë standard për të bërë testin e përdorimit të alkoolit dhe lëndëve narkotike. Kemi një flotë alkooltestues. Janë 6 pajisje drogë testues. Përdorimi i lëndëve narkotike ndikon. Testi i alkoolit ka dalë negative. Testi i drogës ka dalë pozitiv. Janë bërë të gjitha veprimet proceduriale. Po ta shikosh në pamje. Ka pasur totalisht mungesë vëmendje të drejtuesit të automjetit. Shpejtësia është mbi 50, por do të dalë një akt ekspertimi. Policia rrugore identifikon shkaqet kryesore të aksidentit. Në momentin e parë ai ka dashur të flasë para avokatit. Është shmangur të japë shpjegimet e para” – u shpreh ai.
Discussion about this post