Një 31-vjeçar, ish-oficer i Forcave Speciale të Ushtrisë, i cili ka shërbyer disa herë si pjesë e operacioneve paqeruajtëse në Afganistan, është kërcënuar sot nga përkrahësit e ISIS në qytetin ku jeton.
Bëhet fjalë për Alban Caken, i cili menjëherë pasi ka konstatuar se i kanë thyer makinën ka bërë një kallëzim në Prokurorinë e Pogradecit, ku është shprehur se, i rrezikohet jeta për shkak të shkuarës së tij. Sipas tij, përkrahës të ISIS, që janë kthyer tashmë në fshatrat e Pogradecit, e kanë kërcënuar vazhdimisht dhe herë pas herë ka pasur përplasje verbale me ta.
Në kallëzimin e tij, Cake thotë se familja e tij jeton në Pogradec, por ai vetë kohët e fundit jeton me qira në Tiranë, pasi ka filluar punë, pas dy misioneve luftarake që ka pasur në Afganistan.
“Që nga ajo kohë unë kam ikur me misione dhe kam qenë në Tiranë dhe në Pogradec në periudha kohore. Para tri ditësh (përkon me datën 2 tetor) unë kam marrë një makinë me qira. Dje (më datë 4 tetor) mbasdite, unë kam qenë në fshatin tim, Guras dhe pasi kam takuar disa shokë nga fshati dhe kemi pirë kafe, kam parkuar automjetin e marrë me qira, tip ‘Shevorlet’, me targë ‘AA 307 IV’, aty ku kam lënë sa herë edhe makinën time që kam pasur më parë dhe jam larguar për në shtëpi. Kur kam dalë sot (datë 5 tetor) në mëngjes, nëna ime ka konstatuar se xhami anësor i makinës sime, krahu i pasagjerit, ishte i thyer dhe brenda gjetëm një gur”, shprehet ai në kallëzim.
Cake ka treguar në Prokurori se, kjo është një histori e përsëritur që kur ai është kthyer nga shërbimi në Afganistan, prandaj dhe pretendon se ai dhe familja e tij janë në rrezik për jetë.
