Gjykata e Elbasanit ka vendosur të pranojë kërkesën e prokurorisë duke lënë në arrest me burg Florind Shabanin, i akuzuar për veprën penale të “Vrasjes me paramendim” kryer në bashkëpunim ndaj Roland Rexhepit ose siç thirrej në Elbasan “Doda”.
Kujtojmë se Shabani u ekstradua dy ditë më parë nga Gjermania në Shqipëri, dhe pritet që të gjykohet nga drejtësia shqiptare për implikimin e tij në vrasjen e ish-shefit të antidrogës në Policinë e Elbasanit.
Në materialin hetimor, Shabani, paraqitet nga akuza si personi që ka shërbyer si vëzhgues në vrasjen e Roland Rexhepit, ndodhur në 29 korrik 2009, në lagjen “Vullnetari”-Elbasan.
Ndërsa në këtë vrasje ekzekutor me armë, kanë qenë Marjus Tafa dhe Armando Llakaj, të dy të dënuar me 24 dhe 23 vite burg dhe aktualisht ndodhet në burg.
Vrasja e Rexhepit ose siç thirrej në Elbasan me nofkën “Doda”, është kryer për llogari dhe financim, të një grupi kriminal, ku njëri prej anëtarëve të këtij grupi, aktualisht ndodhet në burg për llogari të SPAK dhe tjetri ndodhet në Dubai. Thuhet se ka qenë ADN – ja e Shabanit që ka bërë të mundur konfirmimin e përfshirjes së tij në ngjarje.
Discussion about this post