Mori ryshfet për të liruar një të burgosur, KLGJ i ul pagën gjyqtares së Elbasanit

Këshilli i Lartë Gjyqësor ka pranuar kërkesën e Inspektorit të Lartë të Drejtësisë për procedim disiplinor ndaj gjyqtares së Elbasanit Pajtime Fetahu, duke ulur pagën e kësaj të fundit me 20%.

Kryetarja e KLGJ, Naureda Llagami tha gjatë mbledhjes, se KLGJ vendosi pranimin e masës disiplinore në masën 20% për një periudhë prej 6 muajsh.

Inspektimi disiplinor ndaj Fetahut ka filluar në vitin 2017, pas publikimit të disa video përgjimesh të një qytetari me gjyqtaren dhe një punonjës policie nga emisionit ‘Stop’ në TV Klan. Në videon e transmetuar, magjistratja akuzohet se ka marrë 2 mijë euro ryshfet për uljen e dënimit ndaj një të burgosuri.

Pas publikimit të videos ish-Prokuroria për Krime të Rënda ka regjistruar procedim penal ndaj gjyqtares dhe Gjykata për Krime të Rënda ka vendosur pezullimin e saj nga detyra. Pasi Prokuroria për Krime të Rënda e ka pushuar procedimin për korrupsion ndaj gjyqtares dhe ky vendim është miratuar nga gjykata, ILD e ka rifilluar hetimin disiplinor.

Bazuar në vendimin e gjykatës, ILD ka konstatuar se edhe pse nuk provohet se gjyqtarja ka kryer akte korruptive, nga hetimi janë konfirmuar akte dhe sjellje diskredituese për figurën e magjistrates.

Sipas ILD-së, Fetahu gjithashtu ka shkelur “normat e etikës së komunikimit me publikun.”