Një 49-vjeçar malazez është proceduar penalisht nga policia pasi akzuohet se tentoi të fuste në Shqipëri nëpërmjet pikës kufitare të Morinës 15 mijë euro të padeklaruara. Gjatë kontrollit në mjetin me të cilin lëvizte malazezi, policia njoftoi se gjeti në automjetin tip “Audi” paartë e padeklaruara konform ligjit dhe i sekuestroi.
“Shërbimet e Policisë Kufitare, krahas zbatimit të marrëveshjes mes Shqipërisë dhe Kosovës, kanë rritur vigjilencën për goditjen e paligjshmërive në kufi. Në këtë kuadër, në bashkëpunim me autoritetet doganore, në hyrje të RSh-së, është kaluar në vijën e dytë, për kontroll të detajuar, automjeti tip “Audi” me drejtues shtetasin malazez F. D. Gjatë kontrollit u gjetën 15 000 euro, të cilat ky shtetas po tentonte t’i fuste në Shqipëri, pa i deklaruar konform ligjeve në fuqi”, njoftoi policia.
“Në vijim të veprimeve procedurale për rastin, u referuan materialet në Prokurori, ku nisi procedimi në gjendje të lirë për shtetasin malazez F. D., 49 vjeç, banues në Ulqin, për veprën penale “Mosdeklarimi në kufi i të hollave dhe i sendeve me vlerë”. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme”, shtuan të njëjtat burime.
Discussion about this post