Përfaqësia e OSBE-së në vendin tonë ka zgjedhur Durrësin, për të sjell një tjetër fushatë sensibilizimi përmes artit. Duket se zgjedhja nuk ka qenë e rastësishme, pasi ky qytet mban dhe numrin më të lartë në Shqipëri për krimet ndaj grave. Lëvizja “Not me/ Unë Jo” ka si synim parandaluar dhunën dhe pasojat e saj.
“Kjo nuk është një fushatë pro grave dhe kundër burrave, por është një fushatë që nxit bashkim. Është koha të themi: Jo unë! Gratë duhet t’i thonë vetes: Jo unë! Nuk dua të jem një viktimë. Djemtë duhet të thonë: Nuk do të jem një dhunues. Prindërit të thonë: Jo, fëmijët e mi nuk do të jenë pjesë e dhunës.”, u shpreh Clarisse Pasztory, Zv.kryetare e Prezencës së OSBE Shqipëri.
Në këtë ekspozitë morën pjesë 15 piktorë durrsakë, të cilët përmes artit shpalosin rolin e pazëvendësueshëm të gruas në shoqëri dhe përcjellë mesazhe kundër dhunës.
“Na del si detyrë ne grave që të investojmë më shumë për të ecur në profesionet tona, në inteligjencën, shoqërinë dhe familjet tona.”, shprehet Marjana Goxhabelliu.
Ekspozita e çelur në galerinë e arteve pamore “Nikolet Vasia” do të qëndrojë e hapur deri më 10 dhjetor, Ditën e të Drejtave të Njeriut, ndërsa në hollin e teatrit “Aleksandër Moisiu” të Durrësit u organizua një trajnim me këshilla konkrete për sigurinë e grave dhe vajzave të cilat ndanë dhe përvojat e tyre kur janë ndjerë të kërcënuara.
” Siguria e një gruaje është e lidhur shumë ngushtë me sigurinë e një kombi… Sa më të ndërgjegjshme të jemi aq më të fortë e ndërtojmë veten e të ardhmen dhe kontribuojmë për një shoqëri të sigurtë.”, Frosina Bardhi, eksperte pranë OSBE Shqipëri.
Discussion about this post