Kryetari i Partisë Demokratike Sali Berisha ka dalë sot në bashkëbisedimin e përjavshëm me gazetarët. Një ditë para protestës së opozitës, ai dha një mesazh për Policinë e Shtetit. Berisha i paralajmëroi efektivët që të mos revoltojnë njerëzit. Sipas liderit të djathtë, protesta është e drejtë kushtetuese.
“Mesazhi im është mos revoltoni protestuesit, kaq është. Ata vijnë në të drejtat e tyre kushtetuese.
Vijnë të provokuar në shkallën më të lartë nga një njeri që po ua dëbon fëmijët dhe njerëzit nga shtëpitë e tyre, po i vjedh dhe plaçkit çdo ditë. Kaq është mesazhi im. Asgjë s’mund të zvogëlojë dimensionet e protestës që do jetë nesër”.
Lexo edhe: Nesër protesta, Berisha del me mesazh të fortë: Kulmi i zemërimit të qytetarëve
“Po, ju kam deklaruar se opozita është në protestë, populli opozitar është në protestë kundër kësaj qeveri dhe populli opozitar do të përdorë të gjitha metodat e mosbindjes civile dhe do shpallë moton e tij në protestë sepse ne nuk mund të pajtohemi kurrë me shpërbërjen e kombit shqiptar nga konfiskimi i lirive të shqiptarëve nga një qeveri lidhur kryekëput me krimin, drogën, vjedhjen, mashtrimin.
Ne e kemi shumë seriozisht këtë betejë. Kemi pasur një periudhë që kemi pasur probleme organizimi, riorganizimi, kemi primaret të cilat po ecin shumë mirë dhe që do i vazhdojmë me vendosmërinë më të madhe, por nga ana tjetër kemi armikun e votës dhe të lirive. Me të ne do përballemi siç e meriton”, deklaroi Berisha.
I pyetur për orarin e protestës, teksa Policia ka njoftuar se ka dhënë leje vetëm për dy orë, Berisha tha se do të vazhdojë sa të dojë populli opozitar.
“Policia në interesin e saj më të mirë të mos bëhet mercenare e Edi Ramës, këtë i them policisë. Ka kushtetutë, protestuesit janë fuqia absolute korale e vendit, mjerë ai që i prek. Sa të dojë populli opozitar, sa t’i teket popullit opozitar, ai nesër është sovrani i Shqipërisë”, tha kreu i PD.
Ndër të tjera Berisha tha se nesër protestën e udhëheq populli opozitar, të cilit i bashkohen edhe partitë.
“Bashkëpunimi me çdo opozitar është i vetëkuptueshëm. Janë momentet këto kur sovrani del mbi partitë. Të themi atë që është. Nesër në protestë vërshon populli opozitar. Të gjitha partitë opozitare e gjejnë veten aty. Nesër Shqipërinë e udhëheq populli opozitar”, përfundoi Berisha.
Discussion about this post