Pak para nisjes së seancës plenare, dhjetëra qytetarë janë mbledhur para godinës së Kuvendit, për të protestuar kundër projektligjit për barazinë gjinore.
Protesta është thirrur nga “Koalicioni Shqiptar pro Familjes dhe Jetës”.
Me pankartat “deputetë, mos votoni kundër fëmijëve”, “projektligji i barazisë gjinore, anti-familje”, “largoni duart nga fëmijët”, ata kërkojnë të mos miratohet projektligji.
Edhe kryetari i Partisë Demokratike, Sali Berisha, ka bërë thirrje publike për pjesëmarrje në tubimin paqësor që po zhvillohet përpara Parlamentit të Shqipërisë, në Tiranë.
“Familja duhet të lartësohet, s’do të lejojmë kurrë të nëpërkëmbet dinjiteti i shqiptarëve, identiteti i fëmijëve, të vihet në lojë e ardhmja e Shqipërisë”, tha Akil Pano.
“Ky projektligj të censuron lirinë e shprehjes, të besimit dhe të familjes. Ky është momenti kur myslimanë dhe të krishterë bashkohen për të thënë jo ligjit të George Soros, për të thënë jo projektligjit të politikave të ekstremit të majtë.
Ne jemi sot këtu për të thënë jo rikthimit të komunizmit në Shqipëri, për të thënë jo shkatërrimit të familjes dhe të fëmijëve.
Jemi mbledhur sot këtu nën flamurin shqiptar, pasi Shqipëria meriton të lartësohet, familja duhet të lartësohet dhe njëri duhet të mbështesë tjetrin në gjithçka.
Mbase kemi humbur shumë gjëra në këto vite, por nuk do të lejojmë kurrë që të neperkëmben dinjiteti i shqiptarëve, identiteti i fëmijëve të vihet në lojë dhe ardhmëria e Shqipërisë të rrezikohet.
Unë jam shumë i lumtur që sot me ne prezantë janë imamët e komunitetit fetar, kemi Forumin Mysliman të Shqipërisë, përfaqësues edhe nga KISHA Ungjillore, kemi qytetarë të mbledhur për të bërë rezistencë përballë këtij projektligji.
Ky projektligj nuk trajton vetëm çështje barazie, por në thelb është burokracia më e madhe që ekziston.
Unë dua të falënderoj të gjithë ata që janë sot përballë meje, bashkë me liderin e opozitës, Sali Berisha, i cili është këtu. Falënderoj të gjithë deputetët që do t’i thonë jo këtij projektligji sot”, tha Pano.
Protestës para Parlamentit iu bashkuan për disa minuta edhe kryedemokrati Sali Berisha dhe deputetë të PD-së.
Discussion about this post