Ndërron jetë këngëtarja legjendare e muzikës pop

Këngëtarja legjendare uellsiane Bonnie Tyler është ndarë nga jeta në moshën 75-vjeçare.

Lajmi u konfirmua përmes një njoftimi të publikuar në profilin e saj zyrtar në rrjetet sociale, ku familja dhe ekipi i artistes shprehën dhimbjen për humbjen e saj.

“Familja dhe ekipi i Bonnie-s, me zemër të thyer, njoftojnë se Bonnie ndërroi jetë papritur mbrëmë në spital në Portugali si pasojë e sëmundjes për të cilën po kurohej”, thuhej në deklaratë.

Në muajin maj, artistja iu nënshtrua një operacioni urgjent në zorrë në një spital në Portugali, vendi ku jetonte prej vitesh.

Pas ndërhyrjes ajo u vendos në koma të induktuar për të ndihmuar procesin e rikuperimit. Edhe pse më vonë doli nga koma, gjendja e saj shëndetësore mbeti kritike dhe ajo qëndroi në kujdes intensiv.

Bonnie Tyler ishte një nga zërat më karakteristikë të muzikës ndërkombëtare, e njohur për hitet e pavdekshme të viteve ’80, si “Total Eclipse of the Heart” dhe “Holding Out for a Hero”. Gjatë karrierës së saj u nominua tri herë për çmimin Grammy dhe përfaqësoi Mbretërinë e Bashkuar në Eurovision 2013.

Rrugëtimi i saj drejt famës nisi në mënyrë modeste. Fillimisht këndonte në klube lokale, ndërsa punonte në një dyqan ushqimor.

Talenti i saj u zbulua rastësisht gjatë interpretimit të këngës “Band of Gold”, çka i hapi rrugën regjistrimit të një demoje dhe më pas nënshkrimit të kontratës me shtëpinë diskografike RCA, ku mori edhe emrin artistik Bonnie Tyler.

Edhe pse kënga e saj e parë nuk pati sukses, “Lost in France” u ngjit shpejt në Top 10 në Mbretërinë e Bashkuar, duke shënuar fillimin e një karriere që do ta kthente Bonnie Tyler në një nga ikonat më të mëdha të muzikës pop-rock.