Të paktën 50 njerëz kanë vdekur këtë javë si pasojë e motit të ashpër që goditi Shtetet e Bashkuara, njoftuan autoritetet lokale dhe media të premten.
Ngricat, reshjet e borës dhe temperaturat e ftohta i bëjnë rrugët jashtëzakonisht të rrezikshme, pengojnë trafikun ajror, mbyllin shkollat dhe lënë mijëra familje pa energji elektrike.
Mijëra amerikanë kanë marrë paralajmërime të rënda për motin. Në shtetin Tennessee (SHBA lindore), Departamenti i Shëndetësisë raportoi 14 vdekje të shkaktuara nga moti i keq. Në Pensilvani (në verilindje), pesë gra humbën jetën të martën në një aksident që përfshiu një gjysmërimorkio në një autostradë, sipas policisë.
Pesë vdekje të lidhura me motin u raportuan gjithashtu në Kentakin lindor, tha në një deklaratë guvernatori Andy Beshear, ndërsa në Oregon veriperëndimor, tre persona u goditën nga rryma kur një linjë elektrike ajrore ra në makinën e tyre gjatë një stuhie bore të mërkurën.
Në Oregon, 75,000 njerëz ishin pa energji të premten mbrëma, sipas faqes së internetit Poweroutage.us, dhe guvernatori shpalli gjendjen e jashtëzakonshme.
Vdekje u raportuan gjithashtu në Illinois (verilindje), Kansas (qendër), New Hampshire (verilindje), shtetin e Nju Jorkut (verilindje), Wisconsin (në veri) dhe Uashington (në verilindje).
Sipas faqes së internetit Flightaware.com, 1100 fluturime në SHBA u anuluan dhe 8000 të tjera u vonuan për shkak të kushteve të motit, ndërsa vala e ftohtë pritet të vazhdojë në disa zona si në qendër të vendit gjatë fundjavës.
Discussion about this post