Për shkak të kushteve të vështira atmosferike, Policia Kufitare Greke ka njoftuar Policinë Kufitare të Korçës ditën e sotme, se nga ora 17:00 e datës 12 janar 2025 dhe deri në një njoftim të dytë, nuk do të lejohet lëvizja e mjeteve të tonazhit të rëndë (kamionë dhe autobusë) nëpërmjet pikës së kalimit Kufitar Kapshticë, në drejtim të shtetit grek.
Fillimisht në orët e pasdites u njoftua se ky vendim vlente vetëm për kamionët, por përkeqësimi i situatës solli edhe përfshirjen e autobusëve në ndalim qarkullimi në pikën kufitare.
“Në vijim të njoftimit të dhënë më parë, ku Policia Kufitare Greke, ka njoftuar Policinë Kufitare të Kapshticës për bllokimin e lëvizjes së kamionëve, ju informojmë se: Përveç bllokimit të lëvizjes së mjeteve të tonazhit të rëndë (kamionë), do të ndalohet lëvizja deri në një njoftim të dytë dhe për autobusët”, thuhet në njoftimin zyrtar të policisë vendore.
Do të lejohet vetëm kalimi i autoveturave, të cila duhet të jenë të pajisura me goma dimërore dhe me zinxhirë.
Discussion about this post