Moti i keq, përmbytje dhe probleme me ergjinë në disa qytete

Moti i keq me reshje të dendura shiu dhe erë të fortë ka përfshirë vendin, duke sjellë problematika në disa qytete. Në Lezhë bëhet me dije se janë përmbytur disa zona kryesore, përfshirë bulevardin “Gjergj Fishta” dhe bllokun e banimit “11 Janari” në lagjen Besëlidhja.

Niveli i ujit ka arritur deri në 30 centimetra, duke bllokuar hyrjet e pallateve dhe duke e bërë të vështirë lëvizjen e automjeteve dhe këmbësorëve.

Situata e rënduar nga moti i keq ka sjellë edhe ndërprerje të furnizimit me energji elektrike, ku probleme janë raportuar edhe në zonën turistike të Shëngjinit.

Në Fier, për shkak të stuhisë pati avari në rrjetin elektrik që prekën Mallakastrën, Cakranin, Frakullën dhe zonën bregdetare Darëzezë-Seman. Me ndërhyrjen e ekipeve në terren defektet u riparuan dhe pritet rikthimi i energjisë në zonat bregdetare.

Në disa akse rrugore si Fier-Patos, Fier-Lushnje në afërsi të Mbrostarit dhe segmenti Fier-Rroskovec, u bllokua përkohësisht qarkullimi rrugor nga vërshimi i ujit, ndërsa në Lushnje dhe përgjatë autostradës Levan-Tepelenë u rrëzuan disa pemë, por pa shkaktuar dëme.

Edhe në Lushnje reshjet e dendura të shiut kanë shkaktuar përmbytje në disa rrugë. Kryesisht, akset rrugore në qendër të qytetit kanë prezencë uji, duke e bërë të vështirë kalimin e automjeteve. Po ashtu, edhe në aksin nacional Lushnje- Fier, Lushnje-Rrogozhinë dhe Pluk-Savër kanë prezencë ujë në disa segmente.

Po ashtu edhe në qytetin e Vlorës janë përmbytur disa akse rrugore, konkretisht rruga e Spitalit Rajonal (rruga Ali Demi), rruga e Bashkisë dhe rruga e Portit.

Në Portin e Durrësit, era e fortë shkëputi edhe një nga litarët lidhës me kalatën të tragetit të linjës Durrës-Bari, por fatmirësisht situata u menaxhua me shpejtësi, duke shmangur problemet. Autoriteti Portual Durrës njofton se pas këtij momenti, trageti ka vijuar normalisht lundrimin drejt Barit.

Reshjet e dendura kanë shkaktuar përmbytje edhe në aksin rrugor hyrës të Gjirokastrës. Rrethrrotullimi në hyrje të qytetit ndodhet nën ujë, duke sjellë vështirësi të mëdha në qarkullimin e mjeteve.