Detaj i ri nga atentati në Sarandë, gjendet buzë detit motori i autorëve të dyshuar për plagosjen e Thimjo Rubatit

Zbardhen detaje të reja nga atentati ndaj 50-vjeçarit Thimjo Rubati në Sarandë.

Gjatë kontrolleve të zhvilluara në lagjen “Baba Rexhepi”, policia ka gjetur një motor të braktisur, i cili dyshohet se është përdorur nga autorët pas ngjarjes.

Mjeti u lokalizua buzë detit, në zonën e njohur si “Kasollja”, një gji i vogël në periferi të qytetit.

Sipas burimeve hetimore, motori nuk kishte shenja djegieje apo dëmtimi, çka mund t’u mundësojë ekspertëve të sigurojnë prova biologjike ose materiale gjenetike që mund të ndihmojnë në identifikimin e autorëve.

Fakti që motori është braktisur pranë bregdetit ka ngritur dyshime se autorët mund të jenë larguar me mjet lundrues ose të jenë fshehur në banesat e zonës përreth.

Hetuesit dyshojnë se atentati ka qenë i mirëorganizuar. Sipas informacioneve paraprake, autorët mund të kenë shfrytëzuar konfliktin e ndodhur një ditë më parë mes djalit të Rubatit dhe një efektivi policie për të orientuar hetimet në një drejtim tjetër.

Po ashtu, dyshohet se autorët kanë qenë në dijeni se kamerat e sigurisë në zonë nuk ishin funksionale, pasi pajisja DVR ishte sekuestruar nga policia një natë më parë, duke zgjedhur kështu një vend të pambuluar nga kamerat për të kryer sulmin.

Aktualisht, grupi hetimor po punon mbi dy pista kryesore: një konflikt të mundshëm pronësie dhe një konflikt personal. Ndërkohë, pista e hakmarrjes apo larjes së hesapeve mbetet për momentin më pak e mbështetur nga provat e mbledhura deri tani.