Policia e Tiranës ka zhvilluar operacionin “COMPLEX” që ka të bëjë me trafikun e emigrantëve drejt BE dhe kanë rënë në pranga 5 persona, ndërsa 2 janë nën hetim! Policia gjithashtu ka sekuestruar 72 pasaporta, 37 patenta, 2 ID, 2 makina dhe një shumë parash dhe sende të tjera të kundërligjshme.
Personat e arrestuar janë Sterjo Germenji, 26 vjeç, Anamaria Mihallari, 24 vjeçe, Drita Shehu, 55 vjeçe, Sanije Shehi, 64 vjeçe, dhe Rigers Vejsiu, 26 vjeç.
Personat në fjalë, në bashkëpunim me njëri-tjetrin dyshohet se me mjete e tyre private kundrejt shpërblimit monetar, kryenin transportin e emigrantëve të paligjshëm nga kufiri shqiptario-grek në zonën e Devollit drejt Tiranës.
Emigrantët e paligjshëm pasi strehoheshin nga Drita Shehu dhe Sanije Shehi, motra me njëra-tjetrën, në hotelet e tyre në zonën e Laprakës, bënim organizimin e tyre në bashkëpunim dhe me shtetasin Rigers Vejsiu, djali i Drita Shehu, dhe më pas nisjen e tyre kundrejt pagesës, në drejtim të Kukësit me qëllim kalimin e tyre në Kosovë, me destinacion final vendet e Bashkimit Europian.
Gjithashtu, përveç trafikimit të emigrantëve të parregullt, kishin të organizuar edhe një linjë tjetër trafikimi të shtetasve të huaj që hynin me dokumentacion të rregullt në vendin tonë për qëllime turistike apo punë me leje qëndrimi, të cilët pasi hynin në mënyrë të rregullt nga aeroporti i Rinasit, këta shtetas organizonin punën për trafikimin e këtyre.
Autorët dyshohet se gjatë veprimtarisë së tyre disa vjeçare kanë trafikuar një numër të konsiderueshëm emigrantësh të paligjshëm dhe personave që hynin në vendin tonë me dokumentacion të rregullt. Ndërkohë, materialet proceduriale do t’i kalojnë Prokurorise pranë Gjykatës së Shkallës së Parë Tiranë, për veprime të mëtejshme.
