Jose Mourinho shprehet i kënaqur me kualifikimin në finalen e Europa League, pasi eliminoi Leverkusen në gjysmëfinale dhe për Romën kjo është një finale e dytë radhazi në kompeticionet evropiane.
‘Special One’ ka fituar edicionin inaugurues të Ligës së Konferencave kundrejt Feyenoord në sezonin 2021-22.
Ai shprehet se qëllimi i tij kryesor është të arrij gjëra të rëndësishme me djemtë e Romës si dhe t’u kthejë dashurinë tifozëve.
“Shqetësimi im nuk është të shënoj vendin tim në librat e historisë së Romës. Po i ndihmoj këta djelmosha të rriten, të arrijnë gjëra të rëndësishme. Po i ndihmoj gjithashtu tifozët e Romës që më kanë dhënë kaq shumë që nga dita e parë. Është një gëzim i jashtëzakonshëm të shkosh në një tjetër finale”, ka thënë fillimisht Mourinho për Sky Sport.
Mourinho gjithashtu falënderoi disa nga lojtarët e tij për kontributin e tyre dhe përmendi “epërsinë taktike” të skuadrës së tij si një nga faktorët kyç në suksesin e tyre të fundit evropian.
“Ne humbëm Spinazzolan dhe më pas Celikun, nëse nuk do ta kishim në atë moment do të ishte shumë e vështirë. Detajet e vogla bëjnë diferencën. Mund të falënderojmë edhe Bove, i cili luajti jashtë pozicionit në krahun e djathtë.
Djemtë japin gjithçka, kjo lojë është rezultat i punës, përvojës, urtësisë taktike dhe diturisë si të qëndrojmë në ndeshje. Është një ekip i jashtëzakonshëm”, tha ai.
Portugezi gjithashtu falënderoi tifozët e Romës për mbështetjen e tyre të shkëlqyer gjatë rrugëtimit të tyre në Ligën e Evropës, por kërkoi një favor më shumë për t’u kthyer në Serie A pas disa ditësh.
“Nëse mund t’i kërkoj tifozëve të Romës për më shumë, këta djem meritojnë diçka të veçantë të hënën, duke filluar nga stërvitja në Trigoria dhe në ndeshje”, tha ai
Discussion about this post