Ministria e Shëndetësisë së Kosovës, gjatë mbledhjes me qeverinë propozoi rregullat e reja anti-Covid, të cilat pritet të miratohen së shpejti.
Mësohet se sipas përforcimit të masave në luftën ndaj pandemisë, çdo person që hyn në Kosovë duhet të ketë certifikatën e vaksinimit të plotë ose certifikatën e vaksinimit për vaksinimin me një dozë, jo më e vjetër se katër javë, bashkë me testin RT-PCR negativ për COVID-19, jo më i vjetër se 48 orë.
“Disa masa të reja do të propozohen nga MSH për Qeverinë, bazuar në situatën epidemiologjike dhe rreziqet që mund të vijnë edhe nga varianti Omicron, dhe ato pritet të miratohen së shpejti dhe duhet të zbatohen nga të gjithë. Zbatimi i masave me korrektësi dhe vaksinimi janë aktualisht rruga që duhet ndjekur për të parandaluar përkeqësimin e situatës”, është thënë nga MSH.
Ndërkohë ora policore do të vazhdojë po njësoj, nga ora 00:00 deri në ora 05:00, ndërsa qytetarët do të vazhdojnë të mbajnë maskat. Sipas MSH-së, obligohen institucionet publike e private, si dhe subjektet tjera që në hyrje të çdo objekti të vendosin shenja të dukshme të rregullave të sjelljes për mbrojtje nga COVID-19, përfshirë shenjën e ndalimit të hyrjes në objekt pa maska, respektimin e distancës.
Po ashtu, obligohen përgjegjësit e institucioneve publike e private dhe subjektet e tjera që të kryejnë dezinfektimin dhe ajrosjen e hapësirave të mbyllura.
“Obligohen institucionet publike e private, si dhe subjektet tjera, të mbajnë dezinfektues për duar dhe një sasi të maskave në vende të qasshme në hyrje të objektit si dhe në ambientet e brendshme.”-shprehet MSH.
Ndonëse shifrat e Covid kanë rënë ndjeshëm, ekspertët e shëndetit publik në Kosovë bëjnë thirrje që të respektohen masat anti-Covid dhe të përforcohen ato, kjo dhe për shkak të rrezikut që po i kanoset botës nga varianti i ri i Covid, i quajtur “Omicron”.
Sipas Ministrisë së Shëndetësisë, tetë persona janë infektuar me Covid-19 dhe 1 person ka ndërruar jetë në 24 orët e fundit në Kosovë, ndërsa numri i rasteve aktive ka shkuar në 320. Gjithashtu, në 24 orët e fundit janë injektuar 607 doza të vaksinës kundër COVID-19. Prej fillimit të vaksinimit në të gjitha qytetet e Kosovës janë dhënë 1.615.360 doza të vaksinës.
Discussion about this post