Mund të kishte përfunduar në tragjedi, burri i vë armën në kokë ish-dhëndrit

Një konflikt i çastit në Lezhë mund të kishte përfunduar në vrasje, nëse fqinjët nuk do të kishin njoftuar uniformat blu.

Mëngjesin e sotëm në komisariatin e policisë ka mbërritur një njoftim për një konflikt midis një burri të identifikuar me iniciale K. N. dhe ish-dhëndrit të tij, E. Ç., në fshatin Balldre, Lezhë. Sipas informacioneve, K. N. kishte dhe armë zjarri në banesë.

Policia ka shkuar në adresën e dhënë dhe ka ndërhyrë duke neutralizuar dhe vënë në pranga personin  e identifikuar me iniciale K. N.,  i cili është kapur duke i drejtuar armën në kokë ish-dhëndrit të tij.

Në banesën e të arrestuarit K.N., policia ka gjetur dhe sekuestruar në cilësinë e provës materiale 1 mitraloz, 2 kallashnikovë, një granatë dore me ndezës të montuar, 4 krehra dhe 3979 fishekë.

Materialet do t’i kalojnë Prokurorisë pranë Gjykatës së Shkallës së Parë Lezhë, për veprat penale “Mbajtja pa leje e armëve dhe municionit luftarak” dhe “Dhuna në familje”.