Vllaznia ka nisur me një fitore këtë edicion të Superiores, duke mundur në shtëpi Kukësit me shifrat 3-1. Ka qenë një fitore bindëse për shkodranët, që kanë dominuar sfidën, teksa kanë krijuar më shumë se miqtë të cilët shfaqën vështirësi.
Vendasit, kaluan të parët në avantazh, me anë të Stojanovic (17’), por kuksianët barazuan falë golit të La Torre (24’). Atëherë kur dukej se do të kishim një baraspeshë të gjatë, shkodranët kaluan sërish, me anë të penalltisë të shënuar nga Bekim Balaj (29’).
Në pjesën e dytë, pritej një Kukës më i furishëm, por ndodhi komplet e kundërta me Vllazninë që dominoi totalisht duke sulmuar “pa limit”. Goli i tretë erdhi që në minutën e dytë të pjesës së dytë me anë të Boshnjakut, i cili goditi në mënyrë të përkryer nga distanca.
E vetmja notë negative, e Vllaznisë ishte mungesa e cinizmit, para portës, me djemtë e Memellit që mund të shënonin më shumë gola, por rëndësi kanë tre pikët.
Me këtë fitore, shkodranët, do “flenë” në krye (për shkak të golavarazhit më të mirë se Skënderbeu), në pritje të ndeshjeve të ditës së dielë.
Discussion about this post