Partizani i ka dhënë lamtumirën kupave të Europës, duke u ndalur në një barazim 1-1 përballë Astanës, në turin “play-off” të Conference League.
Ky rezultat, ishte fatal për kampionët e Shqipërisë, të cilët kishin humbur takimin e vajtjes në Kazakistan, me rezultatin 1-0.
Takimi i luajtur në “Elbasan Arena”, nisi në mënyrën më të mirë të mundshme, për “të kuqtë”, të cilët krijuan shumë raste për gol, me miqtë, nga Azia Qendrore, që përpiqeshin të shfrytëzonin kundërsulmet, me Qirkon që ishte me fat kur Tomasov goditi shtyllën në minutat e para të lojës.
Në minutën e 25’, sulmuesi Bintsuka, goditi saktë me kokë, duke mposhtur portierin Condric. Ky gol dërgoi në ekstazë, publikun, duke e motivuar Partizanin që të sulmonte më shumë, me objektivin për të dyfishuar rezultatin.
Megjithatë, mungesa e theksuar e saktësisë përballë portës, sidomos nga ana e Rrapaj, bëri që rezultati të mos ndryshonte më, deri në fund të pjesë së parë.
Pas rikthimit nga dhomat e zhveshjes, atëherë kur pritej që Partizani të sulmonte për të shënuar golin e dytë, miqtë barazuan shifrat, në minutën e parë të pjesës së dytë, me anë të kroatit Tomasov.
Ky gol, e demoralizoi komplet skuadrën kryeqytetase, e cila “u zhduk pothuajse komplet” nga fusha e lojës, duke bërë disa gabime në seri.
Astana nga ana e saj, mendoi vetëm të vononte lojën, me lojtarët që filluan të shtriheshin në tokë, sa herë që kishte ndonjë ndalesë të lojës.
Në minutat e fundit, Partizani krijoi disa mundësi, por problem kryesor i kësaj vere për ta, cinizmi para portës ishte evident, me skuadrën e Zekic që dukej si “e tmerruar” sa herë që i duhej të godiste kuadratin.
Në fund, duhet thënë se dhe arbitri turk, u bë faktor, duke ndëshkuar vetëm lojtarët e Partizanit, ndërsa miqtë, ja hidhnin paq, për çdo ndërhyrje të parregullt që ata bënin, pa harruar që akordoi pak minuta shtesë në raport me vonesat e shkaktuara nga skuadra kazake./m.b /gijotina.com
Discussion about this post